নতুন দিল্লী, ৩১ অক্টোবৰঃ ভাৰতীয় ক্ৰিকেট দলত ১৫ বছৰীয়া বৈভৱ সূৰ্যবংশীৰ ভূমিকা আৰু ভৱিষ্যৎ পৰিকল্পনা স্পষ্ট কৰিবলৈ দল পৰিচালনাক আহ্বান জনাইছে প্ৰাক্তন ভাৰতীয় ক্ৰিকেটাৰ আকাশ চোপ্ৰাই। নিউজিলেণ্ডৰ বিৰুদ্ধে চতুৰ্থ T20Iত বৈভৱক খেলোৱাৰ সুযোগ নিদিয়াৰ সিদ্ধান্তক লৈ প্ৰশ্ন উত্থাপন কৰি তেওঁ কয়, যদি দলত নিয়মীয়াকৈ খেলোৱাৰ পৰিকল্পনা নাই, তেন্তে বৈভৱক ঘৰলৈ পঠিয়াই ঘৰুৱা প্ৰথম শ্ৰেণীৰ ক্ৰিকেট খেলিবলৈ দিব লাগে।
নিউজিলেণ্ডৰ বিৰুদ্ধে চলি থকা পাঁচখনীয়া T20I শৃংখলাৰ দ্বিতীয় আৰু তৃতীয়খন মেচত খেলাৰ সুযোগ পাইছিল বৈভৱে। দ্বিতীয় মেচত মাত্ৰ ৪ ৰান কৰাৰ বিপৰীতে তৃতীয়খন মেচত ১৯টা বলত ৪৫ ৰানৰ আক্ৰমণাত্মক ইনিংছ খেলিছিল তেওঁ। কিন্তু আঘাতৰ পৰা সুস্থ হৈ ইশান কিষাণ দললৈ উভতি অহাৰ পিছত চতুৰ্থখন মেচত বৈভৱক মূল একাদশৰ পৰা বাদ দিয়া হয়।
এই সিদ্ধান্তক লৈ নিজৰ YouTube চেনেলত প্ৰতিক্ৰিয়া প্ৰকাশ কৰি আকাশ চোপ্ৰাই প্ৰশ্ন কৰে—বৈভৱক কেৱল কোনো খেলুৱৈ আঘাতপ্ৰাপ্ত হ’লেহে খেলোৱা হ’ব নেকি? যদি সেয়াই হয়, তেন্তে তেওঁক ঘৰলৈ পঠিয়াই প্ৰথম শ্ৰেণীৰ ক্ৰিকেট খেলিবলৈ সুযোগ দিয়া উচিত। ভাৰতীয় দলৰ সাজ-পোছাক কক্ষত বহি থকাৰ পৰিৱৰ্তে নিয়মীয়াকৈ খেলাৰ সুযোগ পোৱাটো তেওঁৰ বাবে অধিক উপযোগী হ’ব পাৰে বুলি মন্তব্য কৰে প্ৰাক্তন ক্ৰিকেটাৰগৰাকীয়ে।
চোপ্ৰাৰ মতে, বৈভৱৰ বাবে দল পৰিচালনাৰ এক নিৰ্দিষ্ট পৰিকল্পনা থাকিব পাৰে, কিন্তু সেই পৰিকল্পনা ৰাজহুৱাভাৱে স্পষ্ট কৰা হোৱা নাই। দলত তেওঁৰ ভূমিকা কি আৰু আগন্তুক দিনত কেনেদৰে সুযোগ দিয়া হ’ব, সেয়া স্পষ্ট কৰাৰ প্ৰয়োজন আছে বুলিও তেওঁ মত প্ৰকাশ কৰে।
উল্লেখ্য যে, নিউজিলেণ্ডৰ বিৰুদ্ধে চতুৰ্থ T20Iত ভাৰতে ৮৭ ৰানত পৰাজয়ৰ সন্মুখীন হৈছিল। নিউজিলেণ্ডে গ্লেন ফিলিপছৰ ১০৭ ৰানৰ সহায়ত ৭টা উইকেট হেৰুৱাই ২৫৯ ৰান সংগ্ৰহ কৰিছিল। প্ৰত্যুত্তৰত ভাৰতে ৯টা উইকেটৰ বিনিময়ত ১৭২ ৰানহে কৰিবলৈ সক্ষম হয়। অৱশ্যে এই মেচৰ পূৰ্বেই ভাৰতে শৃংখলাটোত ৩-০ৰ অগ্ৰগতিৰে জয় নিশ্চিত কৰিছিল।
চতুৰ্থ মেচত বৈভৱক বাদ দিয়াৰ সিদ্ধান্তক লৈ ক্ৰিকেট মহলত চৰ্চা অব্যাহত থকাৰ মাজতে অন্তিম T20Iত দল পৰিচালনাই কি সিদ্ধান্ত গ্ৰহণ কৰে, সেয়া লক্ষণীয় হ’ব।
