ধুবুৰী, ১ নৱেম্বৰ: ধুবুৰীৰ আলমগঞ্জৰ নৱম খণ্ডত দেওবাৰে পুৱাৰে পৰা বৃহৎ উচ্ছেদ অভিযান চলায় জিলা প্ৰশাসনে। চৰকাৰী ভূমি বেদখলমুক্ত কৰাৰ লক্ষ্যৰে চলোৱা এই অভিযানত ৫০খনতকৈও অধিক বুলড’জাৰ ব্যৱহাৰ কৰা হয়।
উচ্ছেদ অভিযানৰ সময়ত অঞ্চলটোত এক আৱেগিক পৰিৱেশৰ সৃষ্টি হয়। একাংশ বাসিন্দাই মছজিদত প্ৰাৰ্থনা কৰে। আনহাতে, এটা মাজাৰৰ কাষত বহু লোকক কান্দি থকা দেখা যায়। নিজৰ ঘৰ ভাঙি পেলোৱা দেখি একাংশ বাসিন্দাই চকুলো টুকে। এগৰাকী মহিলাই ঘৰ ভাঙি পেলোৱা দৃশ্য দেখি অসুস্থ হৈ পৰে।
ধুবুৰীৰ জিলা আয়ুক্ত দিবাকৰ নাথে জনোৱা মতে, অঞ্চলটোৰ মুঠ ৮০০ বিঘা ভূমিৰ ভিতৰত প্ৰায় ৬৫০ বিঘা চৰকাৰী ভূমি বেদখলমুক্ত কৰাৰ লক্ষ্য লোৱা হৈছে। তেওঁৰ মতে, অঞ্চলটোত প্ৰায় ৫৫০টা পৰিয়ালৰ ৪,০০০ লোক বাস কৰিছিল।
জিলা প্ৰশাসনৰ মতে, উচ্ছেদৰ পূৰ্বে দীৰ্ঘদিন ধৰি আইনী প্ৰক্ৰিয়া চলোৱা হৈছিল। সংশ্লিষ্ট লোকসকলক শুনানিৰ সুযোগ দিয়াৰ লগতে ঘৰ খালী কৰিবলৈ এমাহৰ সময় দিয়া হৈছিল। জিলা আয়ুক্তৰ দাবী, অভিযান আৰম্ভ হোৱাৰ পূৰ্বেই প্ৰায় ৮০ শতাংশ বাসিন্দাই নিজৰ সামগ্ৰী লৈ অঞ্চলটো এৰি গৈছিল।
ইপিনে, একাংশ পৰিয়ালে আদালতৰ কাষ চাপি উচ্ছেদৰ বিৰুদ্ধে আইনী যুঁজ চলাইছে। এই গোচৰৰ পৰৱৰ্তী শুনানি ১৩ নৱেম্বৰত অনুষ্ঠিত হোৱাৰ কথা।
আন একাংশ বাসিন্দাই তেওঁলোকে ব্যক্তিগত লোকৰ পৰা ধন দি মাটি কিনিছিল আৰু সেই মাটি চৰকাৰী বুলি জনা নাছিল বুলি দাবী কৰিছে। তেওঁলোকে বিকল্প বাসস্থান আৰু পুনৰ সংস্থাপনৰ ব্যৱস্থা কৰিবলৈও প্ৰশাসনক আহ্বান জনাইছে।
অৱশ্যে প্ৰশাসনে উচ্ছেদ চলোৱা ভূমি চৰকাৰী বুলি উল্লেখ কৰি অভিযান আইন অনুসৰিয়েই চলোৱা হৈছে বুলি জনাইছে।
