নতুন দিল্লী, ২ নৱেম্বৰ: অযোধ্যাৰ ৰাম মন্দিৰলৈ ভক্তসকলে আগবঢ়োৱা দানৰ ধন আত্মসাতৰ অভিযোগ সম্পৰ্কীয় গোচৰত বিশেষ তদন্তকাৰী দল (SIT)-এ দাখিল কৰা অভিযোগনামাৰ তথ্য গ্ৰহণ কৰিছে উচ্চতম ন্যায়ালয়ে। সোমবাৰে এই গোচৰ সম্পৰ্কীয় সকলো আবেদন নিষ্পত্তি কৰে সৰ্বোচ্চ ন্যায়ালয়ে।
ছলিচিটৰ জেনেৰেল তুষাৰ মেহতাই মুখ্য ন্যায়াধীশ সূৰ্য কান্ত, ন্যায়াধীশ জয়মাল্য বাগচী আৰু ন্যায়াধীশ ভি মোহনাৰে গঠিত বিচাৰপীঠক অৱগত কৰে যে SIT-এ অযোধ্যাৰ ন্যায়িক দণ্ডাধীশৰ আদালতত অভিযোগনামা দাখিল কৰিছে।
তুষাৰ মেহতাই আদালতক জনোৱা মতে, SITৰ তদন্তত মন্দিৰৰ দানৰ ধন গণনা কৰাৰ সময়ত বিত্তীয় অনিয়মৰ তথ্য পোহৰলৈ আহিছে। তদন্তত প্ৰকাশ পোৱা তথ্য অনুসৰি, অভিযুক্তসকলৰ একাংশই এই ধনেৰে সম্পত্তি ক্ৰয় কৰাৰ বিপৰীতে আন একাংশই বেংক একাউণ্টত ধন জমা কৰিছিল বুলি অভিযোগ উঠিছে।
উচ্চতম ন্যায়ালয়ে ছলিচিটৰ জেনেৰেলৰ বক্তব্য নথিভুক্ত কৰি আবেদনসমূহ নিষ্পত্তি কৰে। অৱশ্যে, দানৰ ধন আত্মসাতৰ অভিযোগৰ সত্যাসত্য বা গোচৰৰ মূল বিষয়বস্তু সন্দৰ্ভত আদালতে কোনো মত প্ৰকাশ কৰা নাই বুলি স্পষ্ট কৰি দিয়ে।
আদালতে লগতে কয় যে আবেদনকাৰীসকলে বিচাৰ প্ৰক্ৰিয়াৰ সময়ত অভিযোগকাৰী হিচাপে বিচাৰ আদালতক সহায় কৰিব পাৰিব।
উল্লেখ্য যে, ২১ ছেপ্টেম্বৰত SIT-এ ২৫ ছেপ্টেম্বৰৰ ভিতৰত অথবা তাৰ পূৰ্বে প্ৰথমখন অভিযোগনামা দাখিল কৰাৰ কথা জনাইছিল। এই গোচৰত ইতিমধ্যে কেইবাজনো অভিযুক্তক গ্ৰেপ্তাৰ কৰা হৈছে।
