বাৰাণসী, ২৮ অক্টোবৰঃ যুৱ প্ৰজন্মক Gen-Z বা Gen-Alpha আদি শ্ৰেণীত ভাগ কৰাৰ প্ৰয়োজন নাই বুলি মন্তব্য কৰিছে BJPৰ ৰাষ্ট্ৰীয় সভাপতি নীতিন নবীনে। তেওঁৰ মতে, যুৱক-যুৱতীসকলক কেৱল প্ৰজন্মৰ পৰিচয়েৰে নহয়, তেওঁলোকৰ চিন্তা-চৰ্চা, সামৰ্থ্য আৰু ভৱিষ্যতৰ লক্ষ্যৰ আধাৰত বুজিবলৈ চেষ্টা কৰা উচিত।
বাৰাণসীৰ মহাত্মা গান্ধী কাশী বিদ্যাপীঠত যুৱক-যুৱতীসকলৰ সৈতে হোৱা মত-বিনিময়ৰ সময়ত নীতিন নবীনে এই মন্তব্য কৰে। তেওঁ কয় যে যুৱ প্ৰজন্মৰ কথা শুনা আৰু তেওঁলোকৰ মতামতক গুৰুত্ব দিয়াটো অতি প্ৰয়োজনীয়। প্ৰজন্মৰ নাম বা শ্ৰেণীক লৈ আলোচনা কৰাতকৈ তেওঁলোকৰ আশা-আকাংক্ষা আৰু সমস্যাবোৰ বুজি পোৱাত অধিক গুৰুত্ব দিব লাগে।
যুৱ প্ৰজন্মৰ কৰ্মসংস্থাপন, নতুন উদ্যোগ আৰু প্ৰযুক্তিৰ ক্ষেত্ৰত থকা সম্ভাৱনাৰ বিষয়েও তেওঁ আলোচনা কৰে। দেশৰ উন্নয়নত যুৱক-যুৱতীসকলে গুৰুত্বপূৰ্ণ ভূমিকা পালন কৰিব বুলি উল্লেখ কৰি তেওঁলোকৰ বাবে অধিক সুযোগ সৃষ্টি কৰাৰ প্ৰয়োজনীয়তাৰ ওপৰত গুৰুত্ব আৰোপ কৰে।
নীতিন নবীনে লগতে ভাৰতক এখন উন্নত দেশ হিচাপে গঢ়ি তোলাৰ লক্ষ্যত যুৱ প্ৰজন্মৰ অৱদান গুৰুত্বপূৰ্ণ হ’ব বুলি মন্তব্য কৰে। যুৱক-যুৱতীসকলৰ চিন্তা আৰু সৃষ্টিশীলতাক সন্মান জনাই তেওঁলোকৰ সৈতে মত-বিনিময় অব্যাহত ৰখাৰ প্ৰয়োজন বুলিও তেওঁ কয়।
