গুৱাহাটী, ৩ নৱেম্বৰ: নেপালৰ ছোলুখুম্বু জিলাত অৱতৰণৰ সময়ত দুখন হেলিকপ্টাৰৰ মাজত সংঘৰ্ষৰ ফলত এগৰাকী ৪৭ বছৰীয়া ভাৰতীয় নাগৰিকৰ মৃত্যু হৈছে। এই ঘটনাত ভাৰতীয় মূলৰ এগৰাকী ৫৩ বছৰীয়া নিউজিলেণ্ডৰ নাগৰিক আহত হৈছে।
মঙলবাৰে পুৱা কাঠমাণ্ডুৰ পৰা প্ৰায় ২৫০ কিলোমিটাৰ দূৰত্বত থকা ফেৰিচে হেলিপেডত অৱতৰণৰ চেষ্টা চলোৱাৰ সময়তে এই দুৰ্ঘটনা সংঘটিত হয়। Fishtail Air আৰু Dynasty Airৰ হেলিকপ্টাৰ দুখনৰ ৰ’টৰ ব্লেডৰ মাজত সংঘৰ্ষ হয়।
নিহত ব্যক্তিগৰাকীৰ নাম বসন্ত কুমাৰ বালাৰা মাডু (৪৭)। আহত ব্যক্তিগৰাকী হৈছে শৈলেশ কিশন পেটেল (৫৩), যিগৰাকী নিউজিলেণ্ডৰ নাগৰিক আৰু ভাৰতীয় মূলৰ।
নেপালৰ Civil Aviation Authorityৰ মতে, অৱতৰণৰ বাবে আগবঢ়াৰ সময়ত হেলিকপ্টাৰ দুখনৰ ৰ’টৰ ব্লেড পৰস্পৰৰ সংস্পৰ্শলৈ আহে। ছোলুখুম্বু জিলা আৰক্ষীৰ DSP নবীনৰাজ বুধাথোকীয়েও ফেৰিচেৰ খুম্বু পাছাং লামু হেলিপেডত এই দুৰ্ঘটনা সংঘটিত হোৱা বুলি নিশ্চিত কৰিছে।
দুৰ্ঘটনাত আহত পেটেলক আন এখন হেলিকপ্টাৰেৰে চিকিৎসাৰ বাবে লৈ যোৱা হয়। আনহাতে, নিহত ব্যক্তিগৰাকীৰ মৃতদেহ হেলিকপ্টাৰেৰে লুক্লালৈ নিয়া হয়।
ঘটনাৰ CCTV দৃশ্যও পোহৰলৈ আহিছে। দুৰ্ঘটনাটোৰ কাৰণ আৰু পৰিস্থিতি সন্দৰ্ভত নেপালৰ কৰ্তৃপক্ষই অধিক তথ্য সংগ্ৰহ কৰি আছে।
