গুৱাহাটী, ২ নৱেম্বৰ: অসমৰ বিদ্যুৎ গ্ৰাহকৰ ওপৰত পৰিব পাৰে অতিৰিক্ত আৰ্থিক বোজা। ২০২৬ চনৰ এপ্ৰিলৰ পৰা আগষ্টলৈ জমা হোৱা ১৫৫.৫৯ কোটি টকাৰ Fuel and Power Purchase Price Adjustment Surcharge (FPPPAS) পৰ্যায়ক্ৰমে সংগ্ৰহৰ বাবে Assam Power Distribution Company Limited (APDCL)-ক অনুমতি দিছে Assam Electricity Regulatory Commission (AERC)-এ। এই ধন ২০২৬ চনৰ নৱেম্বৰৰ পৰা ২০২৭ চনৰ মাৰ্চলৈ সংগ্ৰহ কৰা হ’ব।
AERC-ৰ ৩০ অক্টোবৰৰ নিৰ্দেশ অনুসৰি, বানপানীজনিত বাধা আৰু অন্যান্য নিয়ন্ত্ৰণৰ বাহিৰৰ পৰিস্থিতিৰ বাবে নিৰ্ধাৰিত সময়ত এই অতিৰিক্ত মাচুল সংগ্ৰহ কৰিব পৰা নাছিল APDCL-এ। ফলত পাঁচ মাহৰ বিদ্যুৎ ক্ৰয় আৰু সৰবৰাহৰ অতিৰিক্ত ব্যয় জমা হৈ ১৫৫.৫৯ কোটি টকা হৈছিল।
এই ধন সংগ্ৰহৰ বাবে APDCL-এ পাঁচ মাহৰ এটা পৰিকল্পনা দাখিল কৰিছিল। প্ৰতিমাহে ৩.৮১ শতাংশ হাৰত ধন সংগ্ৰহৰ লগতে নৱেম্বৰত ৪০.০৭ কোটি, ডিচেম্বৰত ৩০.৯৫ কোটি, জানুৱাৰীত ২৮.৯৭ কোটি, ফেব্ৰুৱাৰীত ২৯.৩৬ কোটি আৰু মাৰ্চত ২৬.২৩ কোটি টকা সংগ্ৰহৰ প্ৰস্তাৱ দিছিল।
কিন্তু AERC-এ APDCL-ৰ এই নিৰ্দিষ্ট মাহিলি পৰিকল্পনা বা ৩.৮১ শতাংশ হাৰ অনুমোদন কৰা নাই। তাৰ পৰিৱৰ্তে, নৱেম্বৰৰ পৰা মাৰ্চৰ ভিতৰত কিদৰে এই ধন সংগ্ৰহ কৰা হ’ব, সেই সন্দৰ্ভত APDCL-ক নমনীয়তা প্ৰদান কৰিছে। একে সময়তে গ্ৰাহকৰ ওপৰত অতিৰিক্ত আৰ্থিক বোজাৰ প্ৰভাৱ বিবেচনা কৰিবলৈ সংস্থাটোক নিৰ্দেশ দিছে।
APDCL-এ জীৱন ধাৰা শ্ৰেণীৰ গ্ৰাহক আৰু মাহে ১২০ ইউনিটলৈকে বিদ্যুৎ ব্যৱহাৰ কৰা Domestic-A শ্ৰেণীৰ গ্ৰাহকৰ বাবে প্ৰতি ইউনিটত ৫ পইচা মাচুল নিৰ্ধাৰণৰ প্ৰস্তাৱো দিছিল। কিন্তু AERC-এ এই পৃথক হাৰো অনুমোদন কৰা নাই।
আয়োগে লগতে নিৰ্দেশ দিছে যে পূৰ্বৰ পাঁচ মাহৰ জমা হোৱা অতিৰিক্ত মাচুল আৰু একে সময়ছোৱাত প্ৰযোজ্য নিয়মীয়া মাহিলি FPPPAS পৃথককৈ দেখুৱাব লাগিব। APDCL-এ মাহে-মাহে সংগ্ৰহ কৰা ধনৰ হিচাপ, গণনা আৰু বিলৰ সবিশেষ সংৰক্ষণ কৰি নিয়ন্ত্ৰক আয়োগৰ ওচৰত দাখিল কৰিব লাগিব।
উল্লেখ্য যে বৰ্তমানৰ নিয়ম অনুসৰি কোনো মাহৰ FPPPAS সাধাৰণতে তাৰ পৰৱৰ্তী দ্বিতীয় মাহৰ বিলত সংগ্ৰহ কৰা হয়। কিন্তু বানপানীজনিত বাধা আৰু অন্যান্য বিশেষ পৰিস্থিতিৰ বাবে এপ্ৰিলৰ পৰা আগষ্টলৈ জমা হোৱা ধন নিৰ্ধাৰিত সময়ত সংগ্ৰহ কৰিব পৰা নগ’ল বুলি APDCL-এ আয়োগক জনাইছিল।
AERC-এ স্পষ্ট কৰি দিছে যে এই বিশেষ অনুমতি কেৱল বৰ্তমানৰ পৰিস্থিতিৰ বাবেহে প্ৰযোজ্য হ’ব আৰু ভৱিষ্যতৰ আন গোচৰৰ বাবে ইয়াক উদাহৰণ হিচাপে গ্ৰহণ কৰা নহ’ব। নিয়মীয়া সময়ত মাচুল সংগ্ৰহ নিশ্চিত কৰি ভৱিষ্যতে এনেদৰে বৃহৎ পৰিমাণৰ ধন জমা হোৱাটো ৰোধ কৰাৰ ওপৰতো আয়োগে গুৰুত্ব আৰোপ কৰিছে।
ফলত নৱেম্বৰৰ পৰা অহা কেইবামাহলৈ অসমৰ বিদ্যুৎ গ্ৰাহকে নিয়মীয়া মাহিলি মাচুলৰ উপৰি জমা হোৱা অতিৰিক্ত মাচুলৰ বোজাও বহন কৰিবলগীয়া হ’ব পাৰে। অৱশ্যে প্ৰতিমাহে গ্ৰাহকৰ বিলত কিমান অতিৰিক্ত ধন যোগ হ’ব, সেয়া APDCL-এ নিৰ্ধাৰণ কৰিবলগীয়া মাহিলি সংগ্ৰহৰ পৰিকল্পনাৰ ওপৰত নিৰ্ভৰ কৰিব।
