দক্ষিণ কামৰূপৰ যাতায়াত ব্যৱস্থাৰ ক্ষেত্ৰত এক নতুন দিগন্তৰ সূচনা কৰি আজি সোণতলীত এক বৃহৎ পথ নিৰ্মাণ প্ৰকল্পৰ আধাৰশিলা স্থাপন কৰা হয়। 'অসম মালা ৩.০' (Asom Mala 3.0) আঁচনিৰ অধীনত প্ৰায় ৪২ কোটি টকা ব্যয় সাপেক্ষে নিৰ্মাণ হ’বলগীয়া গুমীৰ পৰা নগৰবেৰালৈ যোৱা মথাউৰি পথটোৰ পকীকৰণ কামৰ আনুষ্ঠানিকভাৱে আধাৰশিলা স্থাপন কৰে ছমৰীয়া সমষ্টিৰ বিধায়ক ৰেকিবুদ্দিন আহমেদ আৰু কামৰূপ জিলাৰ আয়ুক্ত (উপায়ুক্ত) দেৱ কুমাৰ মিশ্ৰই। আজি সোণতলীত আয়োজিত এক গাম্ভীৰ্যপূৰ্ণ অনুষ্ঠানত বিধায়ক আৰু জিলা আয়ুক্তগৰাকীয়ে নাৰিকল ভাঙি আৰু ফলক উন্মোচন কৰি এই গুৰুত্বপূৰ্ণ উন্নয়নমূলক প্ৰকল্পটোৰ শুভাৰম্ভ কৰে। আধাৰশিলা স্থাপন কৰি দিয়া ভাষণত বিধায়ক ৰেকিবুদ্দিন আহমেদে কয় যে, "দীৰ্ঘদিন ধৰি এই অঞ্চলৰ ৰাইজে গুমীৰ পৰা নগৰবেৰা সংযোগী মথাউৰি পথটো পকীকৰণৰ বাবে দাবী জনাই আহিছিল। মুখ্যমন্ত্ৰী ড° হিমন্ত বিশ্ব শৰ্মাৰ নেতৃত্বত ৰূপায়ণ হোৱা 'অসম মালা ৩.০' আঁচনিৰ জৰিয়তে আজি ৰাইজৰ সেই সপোন বাস্তৱায়িত হ’বলৈ গৈ আছে। প্ৰায় ৪২ কোটি টকা ব্যয়েৰে নিৰ্মাণ হ’বলগীয়া এই পথটো সম্পূৰ্ণ হৈ উঠিলে বৃহত্তৰ সোণতলী, গুমী আৰু নগৰবেৰা অঞ্চলৰ যাতায়াত ব্যৱস্থা আমূলভাৱে সলনি হ’ব।"

অনুষ্ঠানত উপস্থিত থাকি কামৰূপ জিলাৰ আয়ুক্ত দেৱ কুমাৰ মিশ্ৰই পথ নিৰ্মাণৰ কাম যাতে গুণগত মানদণ্ড বজাই ৰাখি নিৰ্ধাৰিত সময়সীমাৰ ভিতৰত সম্পূৰ্ণ হয়, তাৰ ওপৰত গুৰুত্ব আৰোপ কৰে। তেওঁ লগতে এই প্ৰকল্পটোৱে অঞ্চলটোৰ কৃষিজাত সামগ্ৰীৰ সৰবৰাহ, ছাত্ৰ-ছাত্ৰীৰ অহা-যোৱা আৰু সামগ্ৰিক অৰ্থনৈতিক উন্নয়নত যথেষ্ট অৰিহণা যোগাব বুলি আশা প্ৰকাশ কৰে।উল্লেখযোগ্য যে, বানপানী আৰু জৰাজীৰ্ণ পথৰ বাবে দীৰ্ঘদিন ধৰি যমৰ-যাতনা ভুগি অহা দক্ষিণ কামৰূপৰ চৰাঞ্চল তথা নৈপৰীয়া ৰাইজৰ মাজত আজিৰ এই আধাৰশিলা স্থাপন কাৰ্যসূচীয়ে ব্যাপক উৎসাহ-উদ্দীপনাৰ সৃষ্টি কৰিছে। আজিৰ এই অনুষ্ঠানত লোকনিৰ্মাণ বিভাগৰ শীৰ্ষ বিষয়া-বৰ্গ, স্থানীয় পঞ্চায়ত প্ৰতিনিধি আৰু সহস্ৰাধিক স্থানীয় ৰাইজ উপস্থিত থাকে।