শ্বাহৰুখ খানৰ আহিবলগীয়া ছবি ‘কিং’ৰ ‘তু মিল যায়ে’ শীৰ্ষক গীতৰ এটা দৃশ্যত দীপিকা পাডুকনে গেৰুৱা ৰঙৰ সাজ পৰিধান কৰাক লৈ আপত্তি প্ৰকাশ কৰিছে দিল্লীৰ বিজেপি বিধায়ক ৰবি নেগীয়ে। দৃশ্যটো গীতটোৰ পৰা আঁতৰাই নিদিলে দেশজুৰি প্ৰতিবাদ আৰু ছবিখন বয়কটৰ আহ্বান জনোৱা হ’ব বুলি তেওঁ হুংকাৰ দিছে।

দিল্লীৰ পটপৰগঞ্জ সমষ্টিৰ বিজেপি বিধায়ক ৰবীন্দ্ৰ সিং নেগী, যি ৰবি নেগী নামেৰে পৰিচিত, সংবাদ মাধ্যমৰ সৈতে হোৱা এক সাক্ষাৎকাৰত শ্বাহৰুখ খানক এই দাবী জনায়। গেৰুৱা সাজ পৰিধান কৰা দৃশ্যটো গীতটোৰ পৰা আঁতৰাব লাগিব বুলি তেওঁ কয়।

“সনাতন ধৰ্মৰ বিৰুদ্ধে কোনো কথাই সহ্য কৰা নহ’ব,” বুলি মন্তব্য কৰে নেগীয়ে।

সাক্ষাৎকাৰটোত বিধায়কগৰাকীয়ে শ্বাহৰুখ খানক ‘জেহাদী’ বুলিও অভিহিত কৰে। ভাৰতত উপাৰ্জন কৰাৰ পাছতো দেশৰ ভাবমূৰ্তি ক্ষুণ্ণ কৰাৰ কাম কৰা হৈছে বুলি তেওঁ অভিযোগ তোলে।

নেগীৰ মতে, গেৰুৱা ৰঙৰ ব্যৱহাৰৰ জৰিয়তে ধৰ্মীয় অনুভূতিত আঘাত দিয়াৰ চেষ্টা কৰা হৈছে। এই দৃশ্যৰ বিৰুদ্ধে সনাতনী সংগঠনসমূহেও প্ৰতিবাদ কৰিব বুলি তেওঁ সকীয়াই দিয়ে।

শ্বাহৰুখ খানৰ ৬১সংখ্যক জন্মদিনৰ সৈতে সংগতি ৰাখি ২ নৱেম্বৰত ‘কিং’ ছবিখনৰ প্ৰথমটো গীত ‘তু মিল যায়ে’ মুকলি কৰা হৈছিল। গীতটোত শ্বাহৰুখ খান আৰু দীপিকা পাডুকনক একেলগে নৃত্য কৰা দেখা গৈছে।

গীতটোত দীপিকাৰ গেৰুৱা ৰঙৰ পোছাকক লৈ প্ৰথমে সামাজিক মাধ্যমত চৰ্চা আৰম্ভ হয়। পৰৱৰ্তী সময়ত নেগীৰ মন্তব্যই বিষয়টোক ৰাজনৈতিক বিতৰ্কৰ ৰূপ দিয়ে।

সিদ্ধাৰ্থ আনন্দ পৰিচালিত ছবিখনত শ্বাহৰুখ খান, দীপিকা পাডুকন, সুহানা খান, অভিষেক বচ্চন আৰু ৰাণী মুখাৰ্জীকে ধৰি কেইবাগৰাকীও অভিনেতা-অভিনেত্ৰী আছে। ছবিখন ২৪ ডিচেম্বৰ, ২০২৬ত ছবিগৃহত মুক্তি পোৱাৰ কথা।