নতুন দিল্লী, দেওবাৰ: ভাৰতীয় জনতা পাৰ্টীৰ জ্যেষ্ঠ নেতা তথা দেশৰ প্ৰাক্তন উপ-প্ৰধানমন্ত্ৰী লালকৃষ্ণ আদৱানীৰ ১০০সংখ্যক জন্মদিন উপলক্ষে দেওবাৰে নতুন দিল্লীস্থিত বিজেপিৰ কেন্দ্ৰীয় কাৰ্যালয়ত বিশেষ পূজা-অৰ্চনা আৰু হোমৰ আয়োজন কৰা হয়।
এই অনুষ্ঠানত বিজেপিৰ ৰাষ্ট্ৰীয় সভাপতি নীতিন নবীনকে ধৰি দলটোৰ কেইবাগৰাকীও জ্যেষ্ঠ নেতাই অংশগ্ৰহণ কৰে। নেতাসকলে আদৱানীৰ সুস্বাস্থ্য আৰু দীৰ্ঘায়ু কামনা কৰে।
ইয়াৰ পূৰ্বে বিজেপিৰ ৰাষ্ট্ৰীয় সভাপতি নীতিন নবীনে সামাজিক মাধ্যমৰ জৰিয়তে আদৱানীক জন্মদিনৰ শুভেচ্ছা জনায়। তেওঁ আদৱানীক ভাৰতৰত্ন সন্মানেৰে সন্মানিত দেশৰ প্ৰাক্তন উপ-প্ৰধানমন্ত্ৰী আৰু দলৰ সকলোৰে পথপ্ৰদৰ্শক বুলি অভিহিত কৰে।
ভাৰতীয় জনসংঘৰ পৰা বিজেপিলৈ দলীয় সংগঠন সম্প্ৰসাৰণ আৰু ৰাষ্ট্ৰীয়তাবাদী আদৰ্শ দেশৰ প্ৰতিগৰাকী নাগৰিকৰ মাজলৈ লৈ যোৱাত আদৱানীৰ অৱদান স্মৰণীয়।
নীতিন নবীনে কয় যে ৰাম জন্মভূমি আন্দোলনক গণ-আন্দোলনৰ ৰূপ দিয়াতো আদৱানীৰ গুৰুত্বপূৰ্ণ ভূমিকা আছিল। বিজেপিৰ সভাপতিগৰাকীয়ে এটা ভিডিঅ’ বাৰ্তাৰ জৰিয়তেও আদৱানীক শুভেচ্ছা জনায়। তেওঁৰ মতে, আদৱানীৰ আদৰ্শৰ প্ৰতি থকা দায়বদ্ধতাই বিজেপিক এক সুকীয়া পৰিচয় প্ৰদান কৰিছিল। দলৰ ভিতৰত শক্তিশালী নেতৃত্বৰ এটা দল গঢ়ি তোলাতো আদৱানীৰ ভূমিকা আছিল বুলি নীতিন নবীনে মন্তব্য কৰে।
কেন্দ্ৰীয় গৃহমন্ত্ৰী অমিত শ্বাহেও সামাজিক মাধ্যমত আদৱানীক জন্মদিনৰ শুভেচ্ছা জনায়। তেওঁ আদৱানীক ৰাষ্ট্ৰসেৱাৰ প্ৰতীক, বিজেপিৰ অন্যতম নিৰ্মাতা আৰু নীতি-আদৰ্শত অটল ৰাজনীতিক বুলি অভিহিত কৰে।
অমিত শ্বাহে উল্লেখ কৰে যে সাধাৰণ পৰিয়ালৰ পৰা আহি বিজেপিৰ প্ৰতিষ্ঠাপক সদস্য, ৰাষ্ট্ৰীয় সভাপতি আৰু দেশৰ উপ-প্ৰধানমন্ত্ৰীৰ দায়িত্ব লাভ কৰালৈকে আদৱানীৰ যাত্ৰা ৰাজহুৱা জীৱনত সেৱা আৰু ৰাষ্ট্ৰক সৰ্বোচ্চ স্থান দিয়াৰ এক উদাহৰণ।
