গুৱাহাটী, ৮ নৱেম্বৰ: দীপাৱলীৰ নিশা গুৱাহাটীৰ ধীৰেনপাৰাৰ ৰঘুনাথ পথত এগৰাকী মহিলাক নিৰ্মমভাৱে আক্ৰমণ কৰাৰ অভিযোগ উঠিছে। ঘটনাটোত ৰেশমি দত্ত নামৰ মহিলাগৰাকী সংকটজনক অৱস্থাত চিকিৎসাধীন হৈ আছে।
অভিযোগ অনুসৰি, বিশ্বজিৎ দাস ওৰফে কালুৱে ৰেশমি দত্তক আক্ৰমণ কৰে। আক্ৰমণৰ পিছতে তেওঁ ঘটনাস্থলীতে অচেতন হৈ পৰে। পিছত তেওঁক ওচৰৰ এখন চিকিৎসালয়লৈ লৈ যোৱা হয় আৰু তাত ভৰ্তি কৰোৱা হয়।
ঘটনাৰ পিছতে অভিযুক্ত বিশ্বজিৎ দাস পলায়ন কৰে বুলি জানিব পৰা গৈছে। এতিয়ালৈকে তেওঁৰ সন্ধান পোৱা হোৱা নাই। আক্ৰমণৰ কাৰণো এতিয়ালৈ স্পষ্ট হোৱা নাই।
বিশ্বজিৎ দাসে টেম্পোচালক হিচাপে কাম কৰে বুলি জানিব পৰা গৈছে। তেওঁ সুপ্ৰিয়া কৰ্মকাৰ নামৰ এগৰাকী মহিলাৰ ভাড়াঘৰত থাকিছিল। ঘটনাৰ পিছত তেওঁ ভাড়াঘৰ এৰি পলায়ন কৰে বুলি অভিযোগ উঠিছে।
স্থানীয় লোকসকলে অভিযোগ কৰিছে যে বিশ্বজিৎ দাসে দীৰ্ঘদিন ধৰি অঞ্চলটোত উপদ্ৰৱ চলাই আহিছিল। ধীৰেনপাৰাৰ বাসিন্দাসকলে অভিযুক্তক শীঘ্ৰে গ্ৰেপ্তাৰ কৰাৰ দাবী জনাইছে।
