গুৱাহাটী: ৰাজ্যত অত্যধিক মূল্যবৃদ্ধিৰ প্ৰভাৱ এইবাৰ পৰিছে চৰকাৰী বিদ্যালয়ৰ কণ কণ শিক্ষাৰ্থীৰ দুপৰীয়াৰ আহাৰত। মধ্যাহ্ন ভোজন অৰ্থাৎ PM-POSHAN আঁচনিৰ অধীনত যোগান ধৰা সামান্য ধনেৰে শিক্ষাৰ্থীসকলক পুষ্টিকৰ আহাৰ প্ৰস্তুত কৰাটো কঠিন হৈ পৰিছে বুলি অভিযোগ উত্থাপন কৰিছে শিক্ষক সমাজে।
প্ৰাথমিক পৰ্যায়ৰ এগৰাকী শিক্ষাৰ্থীৰ বাবে খাদ্য প্ৰস্তুতৰ সামগ্ৰী ক্ৰয়ৰ বাবদ চৰকাৰী ন্যূনতম আবণ্টন প্ৰতিদিনে মাত্ৰ ৬.৭৮ টকা। আনহাতে, একাংশ শিক্ষকে স্থানীয় বজাৰত এটা কণীৰ দাম ৯ টকা হোৱা বুলি উল্লেখ কৰিছে।
এটা কণীৰ দামতকৈও কম দৈনিক আবণ্টন!
কেন্দ্ৰীয় চৰকাৰৰ তথ্য অনুসৰি, ২০২৫ চনৰ ১ মে’ৰ পৰা PM-POSHAN আঁচনিৰ অধীনত প্ৰাথমিক পৰ্যায়ৰ শিক্ষাৰ্থীৰ বাবে প্ৰতিদিনে সামগ্ৰী ক্ৰয়ৰ ধন ৬.৭৮ টকা নিৰ্ধাৰণ কৰা হৈছে।
উচ্চ প্ৰাথমিক পৰ্যায়ৰ শিক্ষাৰ্থীৰ বাবে এই পৰিমাণ ১০.১৭ টকা।
এই ধনেৰে দাইল, শাক-পাচলি, তেল, মছলা আৰু অন্যান্য খাদ্য সামগ্ৰী ক্ৰয় কৰিব লাগে। চাউলৰ খৰচ অৱশ্যে পৃথকভাৱে চৰকাৰে বহন কৰে।
সপ্তাহত এটা কণী দিয়াৰ ব্যৱস্থা
অসমৰ PM-POSHAN আঁচনিৰ অধীনত প্ৰতিগৰাকী শিক্ষাৰ্থীক সপ্তাহত এটাকৈ কণী দিয়াৰ ব্যৱস্থা আছে।
অসম চৰকাৰৰ সমগ্ৰ শিক্ষা অভিযানৰ তথ্য অনুসৰি, ২০২১ চনৰ এপ্ৰিলৰ পৰা এই ব্যৱস্থা কাৰ্যকৰী কৰা হৈছে। নিৰামিষভোজী শিক্ষাৰ্থীৰ বাবে বিকল্প হিচাপে ছয়াবিন দিয়াৰ ব্যৱস্থাও আছে।
কিন্তু শিক্ষকসকলৰ প্ৰশ্ন, বৰ্তমানৰ বজাৰ মূল্যৰ সৈতে সংগতি নথকা আবণ্টনেৰে কেনেকৈ শিক্ষাৰ্থীসকলক পুষ্টিকৰ আহাৰ যোগান ধৰা সম্ভৱ?
চাৰি মাহ ধৰি ধন মুকলি নকৰাৰ অভিযোগ
ইফালে, বিগত কেইবামাহ ধৰি মধ্যাহ্ন ভোজনৰ বাবে আবণ্টিত ধন বিদ্যালয়সমূহে লাভ কৰা নাই বুলি অভিযোগ উত্থাপন কৰিছে অসম ৰাজ্যিক প্ৰাথমিক শিক্ষক সন্থাই।
সন্থাৰ মতে, ধন লাভ নকৰাৰ ফলত বহু বিদ্যালয়ৰ প্ৰধান শিক্ষকসকলে স্থানীয় দোকানৰ পৰা বাকীত খাদ্য সামগ্ৰী ক্ৰয় কৰিবলগীয়া হৈছে।
কিন্তু বহু বিদ্যালয়ৰ বাকী ধনৰ পৰিমাণ হাজাৰ হাজাৰ টকাৰ পৰা লাখ টকালৈ বৃদ্ধি পোৱাত দোকানীসকলেও আৰু বাকী দিবলৈ অনিচ্ছা প্ৰকাশ কৰিছে।
নিজৰ জেপৰ ধনেৰে চলাইছে মধ্যাহ্ন ভোজন
চৰকাৰী ধন সময়মতে মুকলি নোহোৱাত বহু প্ৰধান শিক্ষকে নিজৰ ব্যক্তিগত ধন খৰচ কৰি শিক্ষাৰ্থীৰ আহাৰৰ ব্যৱস্থা চলাই নিবলগীয়া হৈছে বুলি শিক্ষক সংগঠনে অভিযোগ কৰিছে।
এফালে বজাৰত খাদ্য সামগ্ৰীৰ মূল্যবৃদ্ধি, আনফালে সময়মতে চৰকাৰী ধন নোপোৱাৰ ফলত এতিয়া সমস্যাৰ সন্মুখীন হৈছে শিক্ষকসকল।
আবণ্টন বৃদ্ধি আৰু ধন মুকলিৰ দাবী
মধ্যাহ্ন ভোজন আঁচনিখন সুচাৰুৰূপে চলাই নিয়াৰ স্বাৰ্থত প্ৰতিগৰাকী শিক্ষাৰ্থীৰ বিপৰীতে আবণ্টিত ধন বৃদ্ধি কৰাৰ দাবী জনাইছে শিক্ষক সমাজে।
ইয়াৰ লগতে বিদ্যালয়সমূহলৈ আবণ্টিত ধন সময়মতে মুকলি কৰা আৰু শিক্ষকসকলক ব্যক্তিগতভাৱে ধন ব্যয় কৰিবলৈ বাধ্য নকৰাৰ দাবীও উত্থাপন কৰিছে।
অসম ৰাজ্যিক প্ৰাথমিক শিক্ষক সন্থাই ধন মুকলিৰ দাবীত চৰকাৰৰ ওচৰত স্মাৰক-পত্ৰ দাখিল কৰি আহিছে।
