মঙলদৈ, ৮ নৱেম্বৰ: দৰং জিলাৰ মঙলদৈ আৰু ছিপাঝাৰ ৰাজহ চক্ৰৰ কেইবাখনো গাঁৱত ব্ৰহ্মপুত্ৰৰ তীব্ৰ গৰাখহনীয়াই ভয়াৱহ ৰূপ ধাৰণ কৰিছে। মঙলদৈ ৰাজহ চক্ৰৰ ৰঙামাটি মৌজাৰ অপৰিয়া, বৰলা খৈতী আৰু ভোকেলিকান্দা গাঁও সৰ্বাধিক ক্ষতিগ্ৰস্ত হৈছে।
স্থানীয় লোকসকলে জনোৱা মতে, অপৰিয়া গাঁৱৰ প্ৰায় সমগ্ৰ অংশ নদীগৰ্ভত জাহ গৈছে। অপৰিয়া এল পি স্কুল, ১ নং পশ্চিম অপৰিয়া এল পি স্কুল, ২ নং পশ্চিম অপৰিয়া এল পি স্কুল আৰু অপৰিয়া স্বাস্থ্য উপ-কেন্দ্ৰও নদীগৰ্ভত বিলীন হৈছে। কেইবাডজন পৰিয়ালে নিৰাপদ স্থানৰ সন্ধানত অঞ্চলটো এৰি গৈছে।
বৰলা খৈতীত ৩ নং বৰলা খৈতী গাঁও সম্পূৰ্ণৰূপে নদীগৰ্ভত জাহ যোৱাৰ বিপৰীতে ২ নং বৰলা খৈতীৰ আধা অংশ ইতিমধ্যে খহনীয়াৰ কবলত পৰিছে বুলি স্থানীয় লোকে দাবী কৰিছে। একসময়ৰ গুৰুত্বপূৰ্ণ ভোটগ্ৰহণ কেন্দ্ৰ বৰলা খৈতী জনকল্যাণ উচ্চ বিদ্যালয়ৰ অস্তিত্বও নাইকিয়া হৈছে।
যোৱা প্ৰায় ছমাহ ধৰি ১ নং বৰলা খৈতীত গৰাখহনীয়াই গুৰুতৰ ভাবুকি সৃষ্টি কৰিছে। চাউলখোৱা ৰাৱমাৰী আঞ্চলিক উচ্চ বিদ্যালয়, নৱনিৰ্মিত স্বাস্থ্য উপ-কেন্দ্ৰ আৰু কেইবাটাও সুদৃঢ় মন্দিৰ ধ্বংসৰ মুখত আছে। নদীখন দিনে দিনে ওচৰ চাপি আহিছে। মঙলদৈ জলসম্পদ বিভাগৰ কৰ্মচাৰীয়ে কেইবাবাৰো আহি ফটো তুলিছে, কিন্তু ক্ষেত্ৰত কোনো ব্যৱস্থা দেখা পোৱা নাই।
বৰলা খৈতীৰ গাঁও প্ৰধান বাবুল ডেকাই জনায় যে, জৰুৰী সুৰক্ষা ব্যৱস্থা গ্ৰহণ নকৰিলে প্ৰায় ১০০টা থলুৱা কৃষক পৰিয়ালে অতি সোনকালে ঘৰ-বাৰী হেৰুৱাব। ১ নং আৰু ২ নং বৰলা খৈতীৰ অৱশিষ্ট অংশও বৰ্তমান ভাবুকিৰ সন্মুখীন হৈছে।
মঙলদৈ ৰাজহ চক্ৰৰ চক্ৰ বিষয়া তন্ময় বৰাই অঞ্চলটোত প্ৰায় ৬০টা পৰিয়ালৰ ৩০০ লোক আৰু ২০০ বিঘা মাটি ক্ষতিগ্ৰস্ত হোৱা বুলি অনুমান কৰিছে। চাপৰি অঞ্চলৰ পলসুৱা মাটিৰ বাবে ভূমিৰ সঠিক সীমা নিৰ্ধাৰণ কৰাটো কঠিন বুলি তেওঁ জনায়।
ইফালে, মঙলদৈ জলসম্পদ সংমণ্ডলৰ কাৰ্যবাহী অভিযন্তা জিতেন দাসে ফোনযোগে জনায় যে, এ সপ্তাহৰ ভিতৰত পৰ্কুপাইন আদি বান-প্ৰতিৰোধী সামগ্ৰীৰে অস্থায়ী সুৰক্ষা ব্যৱস্থা লোৱাৰ পৰিকল্পনা কৰা হৈছে। অৱশ্যে এই সামগ্ৰীসমূহ বানৰ সময়তহে যোগান ধৰা হয় বাবে চৰকাৰৰ যোগানৰ অপেক্ষাত আছে বিভাগটো। ছিপাঝাৰ ৰাজহ চক্ৰৰ ধলপুৰ আৰু আন নদীপৰীয়া গাঁওসমূহতো গৰাখহনীয়াই গুৰুতৰ ৰূপ ধাৰণ কৰিছে।
