৪ নৱেম্বৰঃ ত্ৰিপুৰাৰ পৌৰ নিৰ্বাচনক কেন্দ্ৰ কৰি ৪৫গৰাকী প্ৰাৰ্থীৰ নাম ঘোষণা কৰিছে BJP-য়ে। কিন্তু আগৰতলা পৌৰ নিগমৰ (AMC) বৰ্তমানৰ মেয়ৰ তথা ৰামনগৰ বিধানসভা সমষ্টিৰ বিধায়ক দীপক মজুমদাৰক প্ৰাৰ্থিত্ব নিদিলে দলটোৱে।
৩ নৱেম্বৰত প্ৰকাশ কৰা তালিকাত ৪৫গৰাকী প্ৰাৰ্থীৰ নাম অন্তৰ্ভুক্ত কৰা হৈছে। অহা ২৭ নৱেম্বৰত আগৰতলা পৌৰ নিগমসহ ত্ৰিপুৰাৰ ২১খন পৌৰ নিকায়ত নিৰ্বাচন অনুষ্ঠিত হ’ব।
BJPৰ ৰাজ্যিক সভাপতি অভিষেক দেৱৰয়ে জানিবলৈ দিয়া মতে, কেন্দ্ৰীয় নেতৃত্বৰ অনুমোদনৰ পাছত দলৰ কোৰ কমিটীয়ে প্ৰাৰ্থীসকলৰ নাম চূড়ান্ত কৰিছে। আগৰতলা পৌৰ নিগমৰ বাকী ছটা ৱাৰ্ডৰ প্ৰাৰ্থীৰ নাম ৪ নৱেম্বৰত ঘোষণা কৰা হ’ব বুলিও তেওঁ উল্লেখ কৰে।
দীপক মজুমদাৰক প্ৰাৰ্থিত্ব নিদিয়াৰ কাৰণ ব্যাখ্যা কৰি অভিষেক দেৱৰয়ে কয় যে দলটোৱে ‘এজন নেতা, এটা পদ’ নীতি অনুসৰণ কৰিছে। বিধায়ক হিচাপে মজুমদাৰৰ জনসাধাৰণৰ প্ৰতি দায়িত্ব আছে বুলি মন্তব্য কৰি তেওঁ কয় যে মেয়ৰ হিচাপে মজুমদাৰৰ কাৰ্যকালত কৰা ভাল কামসমূহক নিৰ্বাচনী প্ৰচাৰত দলে গুৰুত্ব দিব।
ইফালে, সংৰক্ষণৰ নিয়ম আৰু দলীয় বিবেচনাকে ধৰি বিভিন্ন কাৰণত কেইবাগৰাকীও বৰ্তমানৰ কৰ্পৰেটৰকো প্ৰাৰ্থিত্বৰ পৰা বাদ দিয়া হৈছে। পৌৰসভা আৰু নগৰ পঞ্চায়তৰ প্ৰাৰ্থী তালিকা শীঘ্ৰে ঘোষণা কৰা হ’ব বুলি ৰাজ্যিক সভাপতিগৰাকীয়ে জানিবলৈ দিয়ে।
মিত্ৰদল Tipra Motha Partyৰ সৈতে আসন বুজাবুজিৰ সন্দৰ্ভত অভিষেক দেৱৰয়ে কয় যে বিভিন্ন পৌৰসভাৰ তিনিটা ৱাৰ্ডত দলটোক প্ৰাৰ্থিত্ব প্ৰদানৰ প্ৰস্তাৱ দিছে BJP-য়ে।
