ইটানগৰঃ অৰুণাচল প্ৰদেশৰ ইটানগৰ ৰাজধানী অঞ্চলত People's Rights Action Committee (PRAC)-এ আহ্বান জনোৱা ১২ ঘণ্টীয়া বন্ধৰ মিশ্ৰিত প্ৰভাৱ পৰিল। বুধবাৰে পুৱা ৫ বজাৰ পৰা আৰম্ভ হোৱা বন্ধৰ সময়ছোৱাত দোকান-পোহাৰ আৰু বাণিজ্যিক প্ৰতিষ্ঠানসমূহ বন্ধ থাকে যদিও চৰকাৰী কাৰ্যালয়সমূহৰ কাম-কাজ স্বাভাৱিকভাৱে চলি থাকে।
ৰাজধানী আৰক্ষী অধীক্ষক জুম্মাৰ বাসাৰে জনোৱা মতে, বন্ধৰ সময়ছোৱা সামগ্ৰিকভাৱে শান্তিপূৰ্ণ আছিল। কোনো আইন-শৃংখলাজনিত সমস্যা বা অপ্ৰীতিকৰ ঘটনা সংঘটিত হোৱাৰ খবৰ পোৱা হোৱা নাই।
উল্লেখ্য, ২৩ অক্টোবৰত Siang, East Siang আৰু Upper Siang জিলাত প্ৰস্তাৱিত Siang Upper Multipurpose Project (SUMP)-ৰ বিৰুদ্ধে হোৱা প্ৰতিবাদৰ সৈতে জড়িত আটকাধীন লোকসকলক মুক্তি দিয়াৰ দাবীত PRAC-এ এই বন্ধৰ আহ্বান জনাইছিল।
সংগঠনটোৰ আন দাবীসমূহৰ ভিতৰত প্ৰস্তাৱিত প্ৰকল্পস্থলীত মোতায়েন কৰা নিৰাপত্তা বাহিনী প্ৰত্যাহাৰ, গাঁওবুঢ়াসকলৰ নিলম্বনৰ নিৰ্দেশ প্ৰত্যাহাৰ আৰু SUMPৰ জৰীপৰ কাম বন্ধ কৰা আদি অন্যতম।
বন্ধৰ সময়ত আইন-শৃংখলা পৰিস্থিতি নিয়ন্ত্ৰণত ৰাখিবলৈ চিভিল ছেক্ৰেটেৰিয়েট আৰু লোকভৱনকে ধৰি গুৰুত্বপূৰ্ণ স্থানত অতিৰিক্ত নিৰাপত্তা বাহিনী মোতায়েন কৰা হৈছিল।
আনহাতে, পুৱা প্ৰায় ৩০জন প্ৰতিবাদকাৰীয়ে নিৰজুলিৰ সমীপৰ বাগে তিনিআলিৰ পৰা ইটানগৰৰ IG Parkলৈ সমদল উলিয়াবলৈ চেষ্টা কৰে। কিন্তু আৰক্ষীয়ে তেওঁলোকক মাজপথতে আঁতৰাই দিয়ে। বন্ধৰ সময়ছোৱাত বাহনৰ চলাচল অব্যাহত থাকিলেও ৰাজধানী অঞ্চলৰ অধিকাংশ পথ প্ৰায় জনশূন্য হৈ পৰে।
