কোকৰাঝাৰ, ৭ নৱেম্বৰ: বিটিচি সচিবালয়ত বিটিচি প্ৰধান হাগ্ৰামা মহিলাৰীৰ সভাপতিত্বত অনুষ্ঠিত কাৰ্যবাহী পৰিষদৰ বৈঠকত ভূমিহীন পৰিয়াললৈ মাটিৰ পট্টা বিতৰণৰ প্ৰক্ৰিয়া ত্বৰান্বিত কৰাৰ সিদ্ধান্ত লোৱা হৈছে। জনসাধাৰণৰ ভূমিৰ মালিকীস্বত্ব লাভ সহজ কৰাৰ লক্ষ্যৰে ভূমি-সম্পৰ্কীয় নীতিসমূহৰো পৰ্যালোচনা কৰা হ'ব।
বৈঠকৰ পাছত সংবাদমাধ্যমৰ আগত মহিলাৰীয়ে কয় যে, ইতিমধ্যে প্ৰায় ৮,০০০খন মাটিৰ পট্টা বিতৰণ কৰা হৈছে। বাকী থকা পট্টা বিতৰণৰ কাম অহা কেইসপ্তাহমানৰ ভিতৰতে সম্পূৰ্ণ কৰা হ'ব বুলি তেওঁ জনায়।
ভূমিহীন হিতাধিকাৰীসকলে ১০১ টকাৰ নামমাত্ৰ মাচুলত পট্টা লাভ কৰিব। ভূমি লেনদেনৰ ক্ষেত্ৰত আৰোপিত প্ৰিমিয়াম হ্ৰাস কৰাৰ বিষয়টো পৰীক্ষা কৰিবলৈ এখন সমিতি গঠনৰো সিদ্ধান্ত লোৱা হৈছে।
বৈঠকত চলি থকা উন্নয়নমূলক প্ৰকল্পসমূহৰ অগ্ৰগতিৰ পৰ্যালোচনা কৰা হয়। বড়োলেণ্ড টেৰিটৰিয়েল ৰিজিয়নত শাসন ব্যৱস্থা, স্বচ্ছতা আৰু অন্তৰ্ভুক্তিমূলক উন্নয়ন সুদৃঢ় কৰাৰ উপায়সমূহো আলোচনা কৰা হয়।
আনহাতে, বড়ো ভলণ্টিয়াৰ ফ'ৰ্চৰ প্ৰাক্তন সদস্যসকলে পৃথক বড়োলেণ্ড ৰাজ্যৰ দাবীত নতুন আন্দোলন গঢ়ি তোলাৰ কথা চিন্তা কৰি থকা বুলি প্ৰকাশ পোৱাৰ পৰিপ্ৰেক্ষিতত, এনে আন্দোলনক বড়োলেণ্ড পিপলছ ফ্ৰণ্টে সমৰ্থন নকৰে বুলি মহিলাৰীয়ে স্পষ্ট কৰে। তেওঁৰ মতে, নতুন আন্দোলনে অঞ্চলটোৰ বৰ্তমানৰ শান্তি-সম্প্ৰীতি বিঘ্নিত কৰাৰ লগতে নতুন প্ৰজন্মৰ ওপৰত বিৰূপ প্ৰভাৱ পেলাব পাৰে।
বড়োলেণ্ডৰ দাবী নাকচ কৰা হোৱা নাই বুলি পুনৰ উল্লেখ কৰি তেওঁ কয় যে, বৰ্তমানৰ পৰিস্থিতিত পুনৰ গণ আন্দোলন আৰম্ভ কৰাৰ কোনো যুক্তি নাই। দীঘলীয়া আন্দোলনে সামাজিক উত্তেজনা, স্বাভাৱিক জীৱনযাত্ৰাত ব্যাঘাত আৰু শিক্ষাৰ্থীসকলৰ শিক্ষাৰ সুযোগ হ্ৰাস কৰে বুলিও তেওঁ মন্তব্য কৰে। জনসাধাৰণে বিটিচি প্ৰশাসনক শাসনভাৰ চলোৱাৰ দায়িত্ব অৰ্পণ কৰিছে বুলি উল্লেখ কৰি তেওঁ কয়, শান্তি আৰু স্থিতিশীলতা বজাই ৰখাই সৰ্বাধিক অগ্ৰাধিকাৰ।
ইফালে, ৭ৰ পৰা ৯ নৱেম্বৰলৈ কোকৰাঝাৰৰ হালোৱাডাল জিজিৰি খেলপথাৰত ওস্তাদ কামিনী নাৰ্জাৰী স্মাৰক সাংস্কৃতিক মহোৎসৱ অনুষ্ঠিত হ'ব বুলি মহিলাৰীয়ে ঘোষণা কৰে। ১১ জানুৱাৰীৰ পৰা ১০ দিনীয়া দাওজং মহোৎসৱ আৰম্ভ হ'ব বুলিও তেওঁ জনায়। বৈঠকত বিটিচিৰ উপ-মুখ্য কাৰ্যবাহী সদস্য ৰিহন দৈমাৰীসহ কেইবাজনো কাৰ্যবাহী সদস্য উপস্থিত আছিল।
