নতুন দিল্লী, ১০ নৱেম্বৰ: বাংলাদেশৰ ৰাজধানী ঢাকাৰ দৰিদ্ৰ অঞ্চলসমূহৰ ভিডিঅ’ প্ৰস্তুত কৰি সেইবোৰ নতুন দিল্লীৰ দৃশ্য বুলি চীনা সামাজিক মাধ্যমত প্ৰচাৰ কৰাৰ অভিযোগক ‘দুৰ্ভাগ্যজনক’ আখ্যা দিছে ভাৰতে। এই ঘটনাৰ সৈতে জড়িত লোকসকলৰ বিৰুদ্ধে ব্যৱস্থা গ্ৰহণ কৰিবলৈ বাংলাদেশৰ সংশ্লিষ্ট কৰ্তৃপক্ষক আহ্বান জনাইছে বৈদেশিক পৰিক্ৰমা মন্ত্ৰালয়ে।
মঙলবাৰে সাপ্তাহিক সংবাদমেলত মন্ত্ৰালয়ৰ মুখপাত্ৰ ৰণধীৰ জয়ছোৱালে কয়, কোনো দেশৰ বিকৃত ছবি দাঙি ধৰাৰ এনে প্ৰচেষ্টাই জড়িত লোকসকলৰ লগতে তেওঁলোকৰ আঁৰত থকা পক্ষসমূহৰ বিশ্বাসযোগ্যতাও ক্ষুণ্ণ কৰে।
“কোনো দেশৰ বিকৃত ছবি দাঙি ধৰাৰ এনে প্ৰচেষ্টা দুৰ্ভাগ্যজনক।”
ঢাকাৰ অঞ্চলসমূহক দিল্লীৰ বুলি দেখুৱাবলৈ বিদেশী লোকক ব্যৱহাৰ কৰাৰ অভিযোগৰ সন্দৰ্ভতো জয়ছোৱালে সংশ্লিষ্ট কৰ্তৃপক্ষক ব্যৱস্থা গ্ৰহণৰ আহ্বান জনায়।
অভিযোগ অনুসৰি, কেইবামাহ ধৰি একাংশ চীনা নাগৰিকে ঢাকাৰ দৰিদ্ৰ অঞ্চলসমূহত ভিডিঅ’ প্ৰস্তুত আৰু সৰাসৰি সম্প্ৰচাৰ কৰি সেই স্থানসমূহক নতুন দিল্লীৰ অঞ্চল বুলি পৰিচয় কৰাই আহিছে। এই ভিডিঅ’সমূহত ভাৰতৰ জীৱন-যাপন, পৰিষ্কাৰ-পৰিচ্ছন্নতা, খাদ্যাভ্যাস আৰু দৰিদ্ৰতাক লৈ অৱমাননাসূচক মন্তব্য কৰা বুলিও অভিযোগ উঠিছে।
ঢাকাৰ উত্তৰাৰ ১২ নম্বৰ ছেক্টৰ আৰু কাষৰীয়া টেকপাৰা অঞ্চলত এনে কাৰ্যকলাপ দেখা গৈছে বুলি অভিযোগ উঠিছে। স্থানীয় বাসিন্দাসকলৰ অনুমান অনুসৰি, ১৫০ৰো অধিক চীনা নাগৰিকে অঞ্চলটোত ভিডিঅ’ প্ৰস্তুত কৰিছে। তেওঁলোকৰ একাংশই দুটা ম’বাইল ফোন লৈ পথ আৰু গলিবোৰত ঘণ্টাৰ পিছত ঘণ্টা সৰাসৰি সম্প্ৰচাৰ কৰাৰ লগতে কেতিয়াবা বাসগৃহৰ ভিতৰতো প্ৰৱেশ কৰি ভিডিঅ’ কৰে বুলি অভিযোগ উঠিছে।
ফাংইউ নামৰ এগৰাকী চীনা নাগৰিকে এই সৰাসৰি সম্প্ৰচাৰসমূহক ৱি-চেটৰ জৰিয়তে সামগ্ৰী প্ৰচাৰৰ অংশ বুলি উল্লেখ কৰিছে। চীনা নাগৰিকসকলৰ সৈতে কাম কৰা বাংলাদেশী মহিলা ৰিতু আখতাৰে ডৌয়িনৰ দৰে মঞ্চত ভিডিঅ’ প্ৰকাশ কৰিও তেওঁলোকে ধন উপাৰ্জন কৰে বুলি জনাইছে।
স্থানীয় বাসিন্দাসকলে অনুমতি অবিহনে ঘৰত প্ৰৱেশ কৰি ভিডিঅ’ প্ৰস্তুত কৰাৰ অভিযোগো উত্থাপন কৰিছে। ৰোজিনা খাতুন নামৰ এগৰাকী বাসিন্দাই কয় যে কেতিয়াবা তেওঁলোকৰ ঘৰত প্ৰৱেশ কৰি ভিডিঅ’ কৰা হয়, যাৰ ফলত পৰিয়ালৰ ব্যক্তিগত গোপনীয়তা বিঘ্নিত হয়।
এই ভিডিঅ’সমূহৰ আঁৰত কোনো সংগঠিত অপপ্ৰচাৰ অভিযান আছে নে নাই, সেয়া এতিয়াও নিশ্চিত হোৱা নাই। চীনা নাগৰিকসকলৰ কাৰ্যকলাপৰ উদ্দেশ্য আৰু ইয়াৰ সৈতে জড়িত পক্ষসমূহৰ বিষয়ে অধিক তথ্যও প্ৰকাশ পোৱা নাই।
