গুৱাহাটী, ১২ নৱেম্বৰ: গুৱাহাটীৰ ফাঁচী বজাৰৰ কামাৰপট্টী এলেকাত দুটা গোটৰ মাজত হোৱা তৰ্কই সংঘৰ্ষৰ ৰূপ লোৱাত ছুৰিকাঘাতৰ ঘটনা সংঘটিত হয়। ঘটনাটোত তিনিজন লোক আহত হৈছে।
১১ নৱেম্বৰৰ নিশা প্ৰায় ৮.৩০ বজাত কামাৰপট্টীৰ বম্বে বিউটি বজাৰৰ সন্মুখত এই ঘটনা ঘটে। প্ৰাৰম্ভিক তথ্য অনুসৰি, দুটা গোটৰ মাজত তৰ্কৰ পিছতে হাতাহাতি হয়।
অভিযোগ অনুসৰি, পথৰ কাষৰ এখন দোকানৰ কৰ্মচাৰীক বম্বে বিউটি বজাৰৰ ভিতৰলৈ টানি নি প্ৰহাৰ কৰা হয়। সংঘৰ্ষৰ সময়ত এজন লোকক ছুৰিৰে আক্ৰমণ কৰা হয়।
আহতসকলক ছামিৰ আহমেদ, জাহিদ আলম মজুমদাৰ আৰু সৌৰভ আলি বুলি চিনাক্ত কৰা হৈছে। ছামিৰ আহমেদ আৰু জাহিদ আলম মজুমদাৰ পথৰ কাষৰ দোকানখনত কৰ্মৰত, আনহাতে সৌৰভ আলি বম্বে বিউটি বজাৰৰ কৰ্মচাৰী।
ঘটনাৰ পিছত দুয়োটা গোটে পানবজাৰ থানাত অভিযোগ দাখিল কৰে। এই অভিযোগৰ ভিত্তিত আৰক্ষীয়ে ১২ নৱেম্বৰৰ বিয়লি ছোহৰাব আলি, মহম্মদ ঔৰংজেব আৰু ছোহাইবক গ্ৰেপ্তাৰ কৰে। ধৃত তিনিওজনেই বম্বে বিউটি বজাৰৰ কৰ্মচাৰী বুলি জানিব পৰা গৈছে।
