গুৱাহাটী, ১৮ নৱেম্বৰ: অসমৰ প্ৰয়াত জনপ্ৰিয় শিল্পী জুবিন গাৰ্গৰ জীৱন-কাহিনী ৰাজ্যৰ নৱম, দশম আৰু উচ্চতৰ মাধ্যমিক প্ৰথম বৰ্ষৰ পাঠ্যপুথিত অন্তৰ্ভুক্ত কৰা হৈছে। শিল্পীগৰাকীৰ জন্মবাৰ্ষিকী উপলক্ষে এই কথা জনাইছে বিজেপি অসম প্ৰদেশৰ সভাপতি দিলীপ শইকীয়াই।
জুবিন গাৰ্গৰ প্ৰতি শ্ৰদ্ধা নিবেদন কৰি শইকীয়াই কয় যে, শিল্পীগৰাকী শাৰীৰিকভাৱে আমাৰ মাজত নাথাকিলেও তেওঁৰ সংগীত আৰু অসমীয়া সংস্কৃতিলৈ আগবঢ়োৱা অসাধাৰণ অৱদানে তেওঁক জনসাধাৰণৰ হৃদয়ত অমৰ কৰি ৰাখিছে।
জুবিন গাৰ্গ কেৱল এগৰাকী গায়ক নহয়, তেওঁ এক সাংস্কৃতিক পৰিঘটনা। তেওঁৰ কণ্ঠই ভৌগোলিক সীমা অতিক্ৰম কৰি বিভিন্ন প্ৰজন্মৰ মানুহক একত্ৰিত কৰিছিল বুলি দিলীপ শইকীয়াই কয়।
শইকীয়াই জনোৱা মতে, পাঠ্যপুথিত জীৱন-কাহিনী অন্তৰ্ভুক্ত কৰাৰ ফলত ছাত্ৰ-ছাত্ৰীসকলে জুবিন গাৰ্গৰ জীৱন-যাত্ৰা, সৃষ্টিশীল অৱদান আৰু অসমীয়া সমাজৰ ওপৰত তেওঁৰ প্ৰভাৱৰ বিষয়ে জানিব পাৰিব।
তেওঁ লগতে কয় যে, জুবিন গাৰ্গৰ প্ৰথম মৃত্যু-বাৰ্ষিকী উপলক্ষে ২০২৬ চনৰ ১৯ ছেপ্টেম্বৰত বিজেপি অসম প্ৰদেশে ৰাজ্যজুৰি আয়োজন কৰা ৰক্তদান শিবিৰসমূহৰ জৰিয়তে মুঠ ১,৮৬৯ ইউনিট ৰক্ত সংগ্ৰহ কৰা হৈছিল। ইয়াৰে গুৱাহাটীৰ অটল বিহাৰী বাজপেয়ী ভৱনত ১১৬ ইউনিট ৰক্ত সংগ্ৰহ কৰা হয়।
জুবিন গাৰ্গৰ স্মৃতি সংৰক্ষণৰ বাবে অসম চৰকাৰে গ্ৰহণ কৰা পদক্ষেপৰ কথা উল্লেখ কৰি শইকীয়াই জনায় যে, পৰিয়ালৰ সদস্য আৰু বিশিষ্ট সাংস্কৃতিক ব্যক্তিসকলৰ সৈতে আলোচনা কৰি সোণাপুৰত স্থায়ী সমাধিক্ষেত্ৰ নিৰ্মাণৰ প্ৰস্তাৱ গ্ৰহণ কৰা হৈছে। শিল্পীগৰাকীৰ অৱদান আৰু আদৰ্শ পৰৱৰ্তী প্ৰজন্মলৈ লৈ যাবলৈ কেৱল স্মৃতিচাৰণ অনুষ্ঠানতে সীমাবদ্ধ নাথাকি অসমীয়া ভাষা, সংগীত আৰু সংস্কৃতিৰ প্ৰসাৰৰ বাবে ধাৰাবাহিক পদক্ষেপ গ্ৰহণৰ প্ৰয়োজন বুলিও তেওঁ উল্লেখ কৰে।