গুৱাহাটী: গুৱাহাটীলৈ বুলেট ট্ৰেইন সম্প্ৰসাৰণৰ অনুমোদন লাভ কৰা বুলি দাবী কৰিছে মুখ্যমন্ত্ৰী হিমন্ত বিশ্ব শৰ্মাই। তেওঁৰ মতে, চিকেন নেকৰ ভৌগোলিক সীমাবদ্ধতাৰ বাবে প্ৰথমে এই প্ৰকল্পক লৈ কাৰিকৰী অসুবিধা আছিল।
মুখ্যমন্ত্ৰীগৰাকীয়ে কয় যে ভাৰত চৰকাৰৰ পৰিকল্পনা অনুসৰি বুলেট ট্ৰেইন পশ্চিমবংগলৈকে অহাৰ কথা আছিল। কিন্তু তেওঁ গুৱাহাটীলৈকে এই সেৱা সম্প্ৰসাৰণৰ বাবে ৰে'ল মন্ত্ৰী অশ্বিনী বৈষ্ণৱৰ সৈতে আলোচনা কৰিছিল।
তেওঁৰ ভাষ্য অনুসৰি, শিলিগুৰি আৰু গুৱাহাটীৰ মাজত থকা প্ৰায় ২২ কিলোমিটাৰ দৈৰ্ঘ্যৰ চিকেন নেক অঞ্চলত নতুন ৰে'লপথ নিৰ্মাণ কৰাটো কঠিন। অঞ্চলটোত ইতিমধ্যে পথ আৰু ৰে'লপথ থকাৰ বাবে অতিৰিক্ত লাইন বহুৱাবলৈ পৰ্যাপ্ত ঠাই নাই বুলি ৰে'ল বিভাগৰ বিষয়াসকলে তেওঁক জনাইছিল।
মুখ্যমন্ত্ৰীয়ে লগতে কয় যে তেওঁ বিষয়টো ৰে'ল মন্ত্ৰী অশ্বিনী বৈষ্ণৱৰ দৃষ্টিগোচৰ কৰিছিল। বৈষ্ণৱে বিকল্প ব্যৱস্থাৰ বিষয়ে চিন্তা কৰাৰ আশ্বাস দিছিল।
হিমন্ত বিশ্ব শৰ্মাৰ দাবী অনুসৰি, প্ৰধানমন্ত্ৰীয়ে এতিয়া গুৱাহাটীলৈকে বুলেট ট্ৰেইন সম্প্ৰসাৰণৰ প্ৰস্তাৱত অনুমোদন জনাইছে। এই প্ৰকল্পৰ বাবে বৰ্তমানৰ ৰে'লপথৰ সমান্তৰালকৈ নতুন লাইন নিৰ্মাণ কৰা হ'ব।
অৱশ্যে, প্ৰকল্পটোৰ নিৰ্মাণ সম্পূৰ্ণ হ'বলৈ সময় লাগিব বুলি মুখ্যমন্ত্ৰীয়ে স্পষ্ট কৰে। তেওঁৰ মতে, গুৱাহাটী এতিয়া বুলেট ট্ৰেইনৰ মানচিত্ৰত অন্তৰ্ভুক্ত হোৱাটো নিশ্চিত।
