শিলচৰ, ৮ নৱেম্বৰ: কালীপূজা আৰু দীপাৱলী উপলক্ষে শিলচৰকে ধৰি কাছাৰ জিলাৰ বিভিন্ন প্ৰান্তত উৎসৱৰ প্ৰস্তুতি তুংগত উঠিছে। চহৰখনৰ বজাৰসমূহত ক্ৰেতাৰ সমাগম বৃদ্ধি পোৱাৰ লগতে কেইবাঠাইতো অস্থায়ী আতচবাজীৰ দোকান গঢ়ি উঠিছে।
ফটাক বজাৰ, গোপালগঞ্জ, জানিগঞ্জ, হাস্পতাল ৰোড, তাৰাপুৰ আৰু মেহেৰপুৰত বেচা-কিনাৰ তৎপৰতা বৃদ্ধি পাইছে। মাটিৰ চাকি, সজোৱা লাইট, পূজাৰ সামগ্ৰী আৰু আতচবাজী কিনিবলৈ লোকসকল বজাৰলৈ ওলাই আহিছে। শিশু থকা পৰিয়ালসমূহেও ফুলঝুৰি, চৰকী, ৰকেট আৰু স্পাৰ্কলাৰ আদি কিনিবলৈ দোকানসমূহলৈ ভিৰ কৰিছে।
ইফালে, কাটিগড়াত ভগৱান গণেশৰ স্থাপত্যৰ আৰ্হিত নিৰ্মাণ কৰা বিশেষ কালীপূজাৰ পেণ্ডেল এইবাৰৰ অন্যতম আকৰ্ষণ। শনিবাৰে ৰামকৃষ্ণ মিছন সেৱাশ্ৰম, শিলচৰৰ সম্পাদক স্বামী গণধীশানন্দই পেণ্ডেলটো উদ্বোধন কৰে। উদ্বোধনী অনুষ্ঠানত ৰাজ্যসভাৰ সাংসদ কানাড পুৰকায়স্থ আৰু সুস্মিতা দেৱ, শিলচৰৰ সাংসদ পৰিমল শুক্লবৈদ্য আৰু কাটিগড়াৰ বিধায়ক কমলাক্ষ দে পুৰকায়স্থ উপস্থিত আছিল।
উৎসৱৰ মাজতে অসম প্ৰদূষণ নিয়ন্ত্ৰণ পৰিষদে আতচবাজী বিক্ৰী আৰু ব্যৱহাৰৰ ক্ষেত্ৰত পৰিৱেশ সুৰক্ষাসম্পৰ্কীয় নিয়ম কঠোৰভাৱে মানি চলিবলৈ আহ্বান জনাইছে। পৰিষদৰ শিলচৰ আঞ্চলিক কাৰ্যালয়ৰ মতে, কেৱল অনুমোদিত সেউজীয়া আতচবাজীহে বিক্ৰী আৰু ব্যৱহাৰ কৰিব পাৰিব। দীপাৱলীৰ নিশা ৮ বজাৰ পৰা ১০ বজালৈকেহে আতচবাজী ফুটোৱাৰ অনুমতি থাকিব। চিকিৎসালয়, শিক্ষানুষ্ঠান, আদালত আৰু ধৰ্মীয় স্থানৰ ৩০০ মিটাৰৰ ভিতৰত আতচবাজী ফুটোৱা নিষিদ্ধ। নিয়ম ভংগ কৰিলে আইনী ব্যৱস্থা লোৱা হ'ব পাৰে বুলি বিষয়াসকলে জনাইছে।
দুৰ্গাপূজাৰ সময়ত শব্দদূষণৰ মূল্যায়নৰ পাছত পৰিষদে দীপাৱলীৰ পূৰ্বে, দীপাৱলীৰ দিনা আৰু পাছৰ সময়ছোৱাতো পৰিৱেশত শব্দৰ মাত্ৰা নিৰীক্ষণ কৰি আছে। শেহতীয়া দুৰ্গাপূজাত সংগৃহীত তথ্য অনুসৰি, চহৰখনজুৰি শব্দৰ মাত্ৰা যথেষ্ট বৃদ্ধি পাইছিল। নিৰ্ধাৰিত তিনিটা নিৰীক্ষণ কেন্দ্ৰৰ ভিতৰত জানিগঞ্জত গড় শব্দৰ মাত্ৰা সৰ্বাধিক আছিল। শিলচৰৰ আঞ্চলিক পৰীক্ষাগাৰ-সহ-কাৰ্যালয়ৰ আঞ্চলিক কাৰ্যবাহী অভিযন্তা অৰবিন্দ দাসে কয় যে, উৎসৱৰ ফলত শব্দৰ মাত্ৰাত পৰা প্ৰভাৱ মূল্যায়নৰ বাবে এই নিৰীক্ষণ চলি আছে।
“প্ৰদূষণ নিয়ন্ত্ৰণ পৰিষদে শব্দৰ মাত্ৰা নিৰীক্ষণ কৰে যদিও নিয়ম কাৰ্যকৰী কৰা আৰু শব্দদূষণ নিয়ন্ত্ৰণৰ দায়িত্ব জিলা প্ৰশাসনৰ,” দাসে কয়।
কাছাৰৰ জিলা আয়ুক্ত ৰাহুল কুমাৰ গুপ্তাই নিয়ম উলংঘনৰ বিৰুদ্ধে প্ৰশাসনে প্ৰয়োজনীয় ব্যৱস্থা ল'ব বুলি আশ্বাস দিছে। দ্য আছাম ট্ৰিবিউনৰ সৈতে কথা পাতি তেওঁ জনায় যে, আইন-শৃংখলা বজাই ৰখাৰ দায়িত্বত থকা বিষয়াসকলক ইতিমধ্যে স্পষ্ট নিৰ্দেশ দিয়া হৈছে আৰু উৎসৱৰ ব্যৱস্থাপনা তদাৰকিৰ বাবে দণ্ডাধীশো নিয়োজিত কৰা হৈছে। প্ৰদূষণ নিয়ন্ত্ৰণ পৰিষদ বা অন্য কোনো উৎসৰ পৰা নিৰ্দিষ্টভাৱে নিয়ম ভংগৰ তথ্য লাভ কৰিলে প্ৰশাসনে ব্যৱস্থা ল'ব বুলিও তেওঁ কয়।
“কোনো নিয়ম ভংগ ধৰা পৰিলে প্ৰয়োজনীয় ব্যৱস্থা লোৱাৰ বাবে সেয়া পোনপটীয়াকৈ প্ৰশাসনক জনাব লাগে। জনসাধাৰণৰ সহযোগিতাও সমানেই গুৰুত্বপূৰ্ণ,” গুপ্তাই কয়।
