ডিব্ৰুগড়, ১১ নৱেম্বৰ: ডিব্ৰুগড় জিলাৰ মাইজানত কুঠাৰেৰে কৰা আক্ৰমণত গুৰুতৰভাৱে আহত হৈ ২৪ বছৰীয়া এজন যুৱকৰ মৃত্যু হৈছে। ঘটনাৰ সৈতে জড়িত থকাৰ অভিযোগত আৰক্ষীয়ে ৩০ বছৰীয়া এজন লোকক গ্ৰেপ্তাৰ কৰিছে।
নিহত যুৱকজনক মাইজান নৰ্থ লাইনৰ বাসিন্দা আমান বেদিয়া বুলি চিনাক্ত কৰা হৈছে।
প্ৰাথমিক তথ্য অনুসৰি, ১০ নৱেম্বৰৰ দিনৰ ভাগতে সন্তোষ ভূঞা নামৰ লোকজনে এখন চোকা কুঠাৰেৰে আমানক আক্ৰমণ কৰাৰ অভিযোগ উঠিছে।
আক্ৰমণত গুৰুতৰভাৱে আহত আমানক ততাতৈয়াকৈ ডিব্ৰুগড়ৰ অসম চিকিৎসা মহাবিদ্যালয় আৰু চিকিৎসালয়ত ভৰ্তি কৰোৱা হয়। কিন্তু চিকিৎসাধীন অৱস্থাতে তেওঁৰ মৃত্যু হয়।
ঘটনাৰ পিছতে ডিব্ৰুগড় আৰক্ষীয়ে অভিযুক্ত সন্তোষ ভূঞাক গ্ৰেপ্তাৰ কৰে। আক্ৰমণৰ আঁৰৰ কাৰণ আৰু ঘটনাৰ পৰিস্থিতি সন্দৰ্ভত আৰক্ষীয়ে তদন্ত অব্যাহত ৰাখিছে।
