ভেৰগাঁও, ১৫ নৱেম্বৰ: ওদালগুৰি জিলাৰ ৰজাগড়ৰ ধৰমজুলিত এজনী ছাগলীয়ে অস্বাভাৱিক আকৃতিৰ পোৱালি জন্ম দিয়াক লৈ অঞ্চলটোত কৌতূহলৰ সৃষ্টি হৈছে।
ধৰমজুলিৰ যাদৱ দাসৰ ঘৰত ছাগলীজনীয়ে দুটা পোৱালি জন্ম দিছে। ইয়াৰে এটা পোৱালিৰ আকৃতি আনটোৰ তুলনাত সম্পূৰ্ণ পৃথক।
পোৱালিটোৰ কপালত চকু, নাকবিহীন মুখমণ্ডল আৰু ফেঁচাৰ দৰে আকৃতি দেখা গৈছে। জন্মৰ পিছৰে পৰা পোৱালিটোৱে স্বাভাৱিকভাৱে চলা-ফুৰা কৰিব পৰা নাই।
অস্বাভাৱিক আকৃতিৰ পোৱালিটোক স্বচক্ষে চাবলৈ বহু লোকে যাদৱ দাসৰ বাসগৃহত ভিৰ কৰিছে।
অৱশ্যে পোৱালিটোৰ এনে শাৰীৰিক গঠনৰ কাৰণ জানিবলৈ এতিয়ালৈকে কোনো পশু চিকিৎসকৰ পৰীক্ষা বা আনুষ্ঠানিক মন্তব্য লাভ কৰা হোৱা নাই। সেয়েহে ইয়াৰ কাৰণ সন্দৰ্ভত নিশ্চিত সিদ্ধান্তত উপনীত হোৱা সম্ভৱ নহয়।
