১৬ নৱেম্বৰ, গুৱাহাটী :
পিকনিকৰ বতৰৰ পূৰ্বে পথ দুৰ্ঘটনা ৰোধ আৰু সুৰক্ষা নিশ্চিত কৰাৰ বাবে অসম চৰকাৰৰ পৰিবহণ বিভাগে কঠোৰ নিৰ্দেশনা জাৰি কৰিবলৈ সাজু হৈছে। পৰিবহণ মন্ত্ৰী চৰণ বড়োৱে ঘোষণা কৰা মতে, এতিয়াৰে পৰা যিকোনো বনভোজকাৰী দলে পিকনিকলৈ যাবলৈ হ'লে চৰকাৰী অনলাইন পৰ্টেলৰ জৰিয়তে আগতীয়াকৈ প্ৰশাসনৰ অনুমতি লোৱাটো বাধ্যতামূলক হ'ব।
আগন্তুক বনভোজৰ বতৰত পথ দুৰ্ঘটনা ৰোধ আৰু যাত্ৰীসকলৰ সুৰক্ষা নিশ্চিত কৰাৰ লক্ষ্যৰে পিকনিকলৈ যোৱা দলসমূহৰ বাবে আগতীয়া প্ৰশাসনিক অনুমতি বাধ্যতামূলক কৰিবলৈ সাজু হৈছে অসম চৰকাৰৰ পৰিবহণ বিভাগ।
পৰিবহণ মন্ত্ৰী চৰণ বড়োৱে জনোৱা অনুসৰি, পিকনিকলৈ যাব বিচৰা প্ৰতিটো দলে চৰকাৰে মুকলি কৰিবলগীয়া অনলাইন পৰ্টেলৰ জৰিয়তে আগতীয়াকৈ অনুমতিৰ বাবে আবেদন কৰিব লাগিব। প্ৰশাসনৰ অনুমতি লাভ কৰাৰ পাছতহে দলসমূহে পিকনিকলৈ যাত্ৰা কৰিব পাৰিব।
নতুন নিৰ্দেশনা অনুসৰি, পিকনিকৰ যাত্ৰা কেৱল দিনৰ পোহৰতহে কৰিব পাৰিব। পুৱা ৭ বজাৰ পূৰ্বে কোনো দলে যাত্ৰা আৰম্ভ কৰিব নোৱাৰিব আৰু সন্ধিয়া হোৱাৰ পূৰ্বে উভতি আহিব লাগিব। অধিক দূৰত্বৰ স্থানলৈ যোৱাৰ ক্ষেত্ৰতো নিষেধাজ্ঞা আৰোপৰ পৰিকল্পনা কৰা হৈছে। কেৱল নিৰ্ধাৰিত ওচৰৰ পিকনিকস্থলীলৈহে অনুমতি দিয়া হ'ব।
পিকনিকত ব্যৱহাৰ কৰা প্ৰতিখন বাহনৰ বৈধ ফিটনেছ চাৰ্টিফিকেট, বীমা আৰু প্ৰদূষণ নিয়ন্ত্ৰণৰ প্ৰমাণপত্ৰ থকাটো বাধ্যতামূলক। যাত্ৰীবাহী বা বাণিজ্যিক বাহনত গতি নিয়ন্ত্ৰণকাৰী যন্ত্ৰ সঠিকভাৱে কাৰ্যক্ষম হৈ থাকিব লাগিব।
চালকৰ ওচৰত বৈধ বাণিজ্যিক চালনা অনুজ্ঞাপত্ৰ আৰু সংশ্লিষ্ট পথত চলাচলৰ প্ৰয়োজনীয় পাৰ্মিট থাকিব লাগিব। অনলাইন পৰ্টেলৰ জৰিয়তে লাভ কৰা প্ৰশাসনৰ অনুমতিপত্ৰখনো যাত্ৰাৰ সময়ত লগত ৰাখিব লাগিব।
বাহনৰ অনুমোদিত আসনক্ষমতাতকৈ অধিক যাত্ৰী কঢ়িওৱাত নিষেধাজ্ঞা আৰোপ কৰা হৈছে। চালকে সুৰাপান কৰি গাড়ী চলাব নোৱাৰিব। বাহনৰ ভিতৰত বা পিকনিকস্থলীত অতি উচ্চ স্বৰত ডিজে বা মাইক বজাই পৰিৱেশ বিনষ্ট কৰাতো প্ৰশাসনে বাধা আৰোপ কৰিছে।
কাজিৰঙাৰ ৰঙাজানত সংঘটিত ভয়াৱহ পথ দুৰ্ঘটনাত ২৬ জন লোকৰ মৃত্যুৰ পাছতে ৰাজ্য চৰকাৰে পথ সুৰক্ষাৰ ক্ষেত্ৰত কঠোৰ পদক্ষেপ গ্ৰহণ কৰিছে। আগন্তুক বনভোজৰ বতৰত এনে দুৰ্ঘটনা ৰোধ কৰাৰ লক্ষ্যৰে এই নতুন ব্যৱস্থা গ্ৰহণৰ কথা ঘোষণা কৰা হৈছে। অৱশ্যে, অনলাইন পৰ্টেল মুকলিৰ নিৰ্দিষ্ট তাৰিখ, ৱেবছাইটৰ ঠিকনা আৰু আবেদন প্ৰক্ৰিয়াৰ সবিশেষ এতিয়াও আনুষ্ঠানিকভাৱে প্ৰকাশ কৰা হোৱা নাই।