ডিব্ৰুগড়, ১৮ নৱেম্বৰ: দুলীয়াজানত তিনিজন লোকক হত্যাৰ গোচৰত গ্ৰেপ্তাৰ হোৱা দুই অভিযুক্ত ৰাজু দাস আৰু আমিৰ দাসক ৭ দিনৰ আৰক্ষী জিম্মালৈ প্ৰেৰণ কৰিছে ডিব্ৰুগড় আদালতে।
আদালতত হাজিৰ কৰোৱাৰ পিছত তদন্তৰ স্বাৰ্থত অভিযুক্ত দুজনক আৰক্ষীৰ জিম্মালৈ প্ৰেৰণৰ নিৰ্দেশ দিয়া হয়। এই হত্যাকাণ্ডই সমগ্ৰ অঞ্চলটোত তীব্ৰ চাঞ্চল্যৰ সৃষ্টি কৰাৰ মাজতে আৰক্ষীয়ে গোচৰটোৰ তদন্ত অধিক আগবঢ়াই নিছে।
দুলীয়াজানৰ কমলাবাৰী অঞ্চলত অৱসৰপ্ৰাপ্ত অইল ইণ্ডিয়া কৰ্মচাৰী চন্দ্ৰকান্ত ভূঞা, তেওঁৰ পত্নী এলিজা ভূঞা আৰু কন্যা নিহাৰিকা ভূঞাৰ মৃতদেহ উদ্ধাৰ হৈছিল। ঘৰৰ ভিতৰত পৃথক পৃথক কোঠাত তিনিওজনৰ মৃতদেহ উদ্ধাৰ হোৱাৰ পিছতে আৰক্ষীয়ে তদন্ত আৰম্ভ কৰে।
পৰিয়ালটোৰ সৈতে সম্পৰ্ক থকা ৰাজু দাস আৰু আমিৰ দাসক সন্দেহৰ ভিত্তিত আটক কৰা হয়। চিচিটিভি ফুটেজৰ সহায়ত আৰক্ষীয়ে অভিযুক্ত দুজনৰ গতিবিধি অনুসৰণ কৰে। পলায়নৰ চেষ্টা চলোৱাৰ সময়ত ছিমলুগুৰি ৰে'ল ষ্টেচনৰ সমীপত ৰে'লৰ পৰা দুয়োকে আটক কৰা হৈছিল।
আৰক্ষীৰ মতে, হত্যাকাণ্ডৰ পিছত ঘৰৰ পৰা নগদ ধন আৰু সোণৰ আ-অলংকাৰসহ বিভিন্ন সামগ্ৰী লুট কৰাৰ অভিযোগো উত্থাপিত হৈছে। অনলাইন জুৱাত ধন হেৰুওৱাৰ পিছত ঋণ পৰিশোধৰ উদ্দেশ্যে লুটপাতৰ পৰিকল্পনা কৰাৰ সম্ভাৱনাও তদন্তত পোহৰলৈ আহিছে বুলি আৰক্ষীয়ে জনাইছে।
আৰক্ষী জিম্মাৰ এই সময়ছোৱাত হত্যাকাণ্ডৰ উদ্দেশ্য, ঘটনাৰ সৈতে জড়িত আন কোনো লোক আছিল নেকি আৰু লুটপাতৰ অভিযোগৰ বিভিন্ন দিশ আৰক্ষীয়ে পৰীক্ষা কৰিব। গোচৰটোৰ চূড়ান্ত সত্যতা তদন্ত আৰু আদালতৰ বিচাৰ প্ৰক্ৰিয়াৰ পিছতহে স্পষ্ট হ'ব।