১ নৱেম্বৰ: বিশেষ সংশোধন (SIR)ক লৈ পুনৰ সৰৱ অসমৰ মুখ্যমন্ত্ৰী হিমন্ত বিশ্ব শৰ্মা। কংগ্ৰেছ নেতা ৰাহুল গান্ধীক লক্ষ্য কৰি তেওঁ কয়, SIRৰ জৰিয়তে ভোটাৰ তালিকাৰ পৰা অনুপ্ৰৱেশকাৰীৰ নাম কৰ্তন কৰা হৈছে। বাবৰ আৰু ঔৰংজেৱৰ প্ৰসংগ উত্থাপন কৰিও কংগ্ৰেছক সমালোচনা কৰে মুখ্যমন্ত্ৰীগৰাকীয়ে।
বিজেপিৰ ‘লোকতন্ত্ৰ বচাও, অৰাজকতা হটাও’ শীৰ্ষক পদযাত্ৰা কাৰ্যসূচীত অংশগ্ৰহণ কৰি ভাষণ প্ৰদান কৰে হিমন্ত বিশ্ব শৰ্মাই। নিৰ্বাচনী ভোটাৰ তালিকাৰ বিশেষ সংশোধনক লৈ বিৰোধীৰ স্থিতিৰ সমালোচনা কৰে তেওঁ।
ভাষণত মুখ্যমন্ত্ৰীয়ে দাবী কৰে যে SIR প্ৰক্ৰিয়াৰ জৰিয়তে ভোটাৰ তালিকাৰ পৰা অনুপ্ৰৱেশকাৰীৰ নাম কৰ্তন কৰা হৈছে। অসম আৰু পশ্চিমবংগৰ প্ৰসংগ উল্লেখ কৰি তেওঁ প্ৰশ্ন কৰে—SIR নকৰিলে এনে লোকৰ নাম কেনেকৈ আঁতৰোৱা হ’ব?
বাবৰ-ঔৰংজেৱৰ প্ৰসংগৰে কটাক্ষ
ভাষণত মোগল শাসক বাবৰ আৰু ঔৰংজেৱৰ নাম উল্লেখ কৰি শৰ্মাই কয় যে ভোটাৰ তালিকাৰ পৰা ‘বাবৰ আৰু ঔৰংজেৱ’ৰ নাম আঁতৰাবলৈও এই প্ৰক্ৰিয়াৰ প্ৰয়োজন। এই মন্তব্যৰে তেওঁ SIRৰ বিৰোধিতা কৰা কংগ্ৰেছৰ স্থিতিক সমালোচনা কৰে।
বিজেপি-বিৰোধীৰ মাজত ৰাজনৈতিক বাকযুদ্ধ
উল্লেখ্য যে ১ নৱেম্বৰত দিল্লীৰ ৰামলীলা ময়দানত SIR আৰু নিৰ্বাচন আয়োগৰ নিৰপেক্ষতাক লৈ প্ৰশ্ন উত্থাপন কৰি INDIA মিত্ৰজোঁটে সমাৱেশ অনুষ্ঠিত কৰিছিল। আনহাতে, বিজেপিয়ে দেশৰ বিভিন্ন স্থানত SIRৰ সমৰ্থনত পদযাত্ৰা উলিয়ায়। ভোটাৰ তালিকাৰ সংশোধনক কেন্দ্ৰ কৰি বিজেপি আৰু বিৰোধীৰ মাজৰ ৰাজনৈতিক সংঘাত অব্যাহত আছে।
