সমাজবাদী পাৰ্টিৰ জ্যেষ্ঠ নেতা আজম খানে অৱশেষত গাজিয়াবাদৰ দাসনা কাৰাগাৰৰ পৰা মুক্তি লাভ কৰিছে। ধন সৰবৰাহৰ গোচৰত এলাহাবাদ উচ্চ ন্যায়ালয়ে অন্তৱৰ্তীকালীন জামিন প্ৰদান কৰাৰ পিছত বুধবাৰে কাৰাগাৰৰ পৰা ওলাই আহে ৭৮ বছৰীয়া নেতাগৰাকী। জামিনৰ আইনী প্ৰক্ৰিয়া সম্পূৰ্ণ হোৱাৰ পিছতে তেওঁৰ মুক্তিৰ পথ মুকলি হয়।

আদালতৰ এই সকাহৰ পূৰ্বে মঙলবাৰে উচ্চতম ন্যায়ালয়ে ভুৱা জন্ম প্ৰমাণ-পত্ৰৰ গোচৰত আজম খানৰ দোষী সাব্যস্ত হোৱাৰ নিৰ্দেশ স্থগিত ৰখাৰ বিৰুদ্ধে উত্তৰ প্ৰদেশ চৰকাৰে দাখিল কৰা আবেদন খাৰিজ কৰিছিল। একে গোচৰত তেওঁৰ পত্নী তাজিন ফাতিমা আৰু পুত্ৰ আব্দুল্লা আজমেও সকাহ লাভ কৰে।

ধন সৰবৰাহৰ গোচৰত বলপূৰ্বকভাৱে গ্ৰেপ্তাৰ কৰাৰ প্ৰক্ৰিয়াক লৈ আজম খানে আদালতৰ কাষ চাপিছিল। এলাহাবাদ উচ্চ ন্যায়ালয়ৰ ন্যায়াধীশ ৰাজীৱ গুপ্তা আৰু দেৱেন্দ্ৰ সিঙৰ বিচাৰপীঠে গ্ৰেপ্তাৰৰ সময়ত প্ৰয়োজনীয় লিখিত কাৰণ প্ৰদান নকৰাৰ বিষয়টোত আপত্তি প্ৰকাশ কৰে। আদালতৰ প্ৰাথমিক পৰ্যবেক্ষণ অনুসৰি, গ্ৰেপ্তাৰৰ সময়ত সংবিধানৰ ২২(১) অনুচ্ছেদ আৰু Prevention of Money Laundering Act-ৰ ১৯ নং ধাৰাৰ বাধ্যতামূলক বিধানসমূহ যথাযথভাৱে পালন কৰা হোৱা নাছিল।

উল্লেখ্য যে, যোৱা ৩১ অক্টোবৰত আন এটা গোচৰত জামিন লাভ কৰি ৰামপুৰ কাৰাগাৰৰ পৰা ওলাই অহাৰ কিছু সময়ৰ পিছতে ইডিয়ে আজম খানক পুনৰ গ্ৰেপ্তাৰ কৰিছিল। এইবাৰ ধন সৰবৰাহৰ গোচৰত তেওঁক আটক কৰি গাজিয়াবাদৰ দাসনা কাৰাগাৰত ৰখা হৈছিল।

ইফালে, উচ্চ ন্যায়ালয়ে প্ৰদান কৰা অন্তৱৰ্তীকালীন জামিনক প্ৰত্যাহ্বান জনাই ইডিয়ে উচ্চতম ন্যায়ালয়ৰ কাষ চাপিছে। বুধবাৰে উচ্চতম ন্যায়ালয়ে আজম খানৰ মুক্তি স্থগিত ৰখাৰ আবেদন গ্ৰহণ নকৰিলে আৰু ইডিৰ প্ৰত্যাহ্বানৰ শুনানি বৃহস্পতিবাৰে গ্ৰহণ কৰাৰ সিদ্ধান্ত লয়। ফলত ইডিৰ আপত্তিৰ মাজতো আজম খানৰ অন্তৱৰ্তীকালীন জামিনত মুক্তিৰ পথ বন্ধ নহ'ল।

এই গোচৰৰ পৰৱৰ্তী শুনানি এলাহাবাদ উচ্চ ন্যায়ালয়ে ১০ ডিচেম্বৰত ধাৰ্য কৰিছে।