দেশৰ বিভিন্ন প্ৰান্তত Gen Zৰ প্ৰতিবাদৰ আঁৰত ষড়যন্ত্ৰ থকাৰ সন্দেহ প্ৰকাশ কৰিছে Rashtriya Swayamsevak Sangh (RSS)ৰ সাধাৰণ সম্পাদক দত্তাত্ৰেয় হোছাবালে। তেওঁৰ অভিযোগ, দেশৰ ভিতৰ আৰু বাহিৰৰ একাংশ অৰাজক শক্তিয়ে যুৱ প্ৰজন্মক উচটনি দি সমাজত অস্থিৰতা আৰু বিভাজনৰ পৰিৱেশ সৃষ্টি কৰিবলৈ চেষ্টা চলাইছে।

ইন্দোৰত অনুষ্ঠিত RSSৰ অখিল ভাৰতীয় কাৰ্যকৰী মণ্ডলৰ বৈঠকৰ সময়ত সংবাদ মাধ্যমৰ সৈতে হোৱা বাৰ্তালাপত এই মন্তব্য কৰে হোছাবালে। তেওঁ কয় যে আন দেশৰ অভিজ্ঞতাৰ পৰা এনে প্ৰতিবাদৰ আঁৰত ষড়যন্ত্ৰ থকাৰ সম্ভাৱনা দেখা যায়। অৱশ্যে যুৱ প্ৰজন্মৰ প্ৰতিবাদক কেৱল দেশবিৰোধী কাৰ্যকলাপ বুলি অভিহিত কৰাটো উচিত নহয় বুলিও তেওঁ স্পষ্ট কৰে।

হোছাবালেৰ মতে, যুৱক-যুৱতীসকলৰ ক্ষোভ, সমস্যা আৰু দাবী শুনাটো অত্যন্ত প্ৰয়োজনীয়। প্ৰতিটো প্ৰজন্মৰ যুৱ সমাজৰ মাজতে সেই সময়ৰ প্ৰচলিত ব্যৱস্থা আৰু ধাৰণাৰ বিৰুদ্ধে অসন্তুষ্টি গঢ় লৈ উঠে। এই অসন্তুষ্টিক ইতিবাচক দিশেৰে পৰিচালিত কৰিব লাগে। যুৱ প্ৰজন্মৰ ক্ষোভক ৰাজনৈতিক স্বাৰ্থ পূৰণ, সমাজত বিভাজন সৃষ্টি বা হিংসাত্মক কাৰ্যকলাপৰ বাবে ব্যৱহাৰ কৰাটো গ্ৰহণযোগ্য নহয় বুলিও তেওঁ মন্তব্য কৰে।

RSSৰ বৈঠকত নিবনুৱা সমস্যা, পৰীক্ষাৰ প্ৰশ্নকাকত ফাদিল, ভোটাৰ তালিকাৰ বিশেষ নিবিড় সংশোধন (SIR)ক লৈ সৃষ্টি হোৱা বিতৰ্ক আৰু দেশৰ আভ্যন্তৰীণ বিষয়ত বাহ্যিক হস্তক্ষেপৰ আশংকাকে ধৰি বিভিন্ন বিষয় আলোচনা হোৱা বুলি প্ৰতিবেদনত প্ৰকাশ পাইছে।

SIRক লৈও মন্তব্য

ভোটাৰ তালিকাৰ বিশেষ নিবিড় সংশোধন (SIR)ক লৈ চলি থকা বিতৰ্ক সন্দৰ্ভতো নিজৰ মত প্ৰকাশ কৰে হোছাবালে। তেওঁৰ মতে, গণতান্ত্ৰিক ব্যৱস্থাত ৰাজনৈতিক দলসমূহে নিজৰ মত প্ৰকাশ আৰু প্ৰতিবাদ কৰাৰ অধিকাৰ আছে। কিন্তু প্ৰতিবাদ কৰাৰ পূৰ্বে বিষয়টোৰ সত্যতা পৰীক্ষা কৰা উচিত।

তেওঁ ভোটাৰ তালিকাত মৃত ব্যক্তিৰ নাম আৰু একাধিক স্থানত একেজন ব্যক্তিৰ নাম থকাৰ বিষয়টো উত্থাপন কৰে। এনে ভুল সংশোধন কৰাটো প্ৰয়োজনীয় বুলি মন্তব্য কৰি তেওঁ কয় যে ভোটাৰ তালিকাত ভাৰতীয় নাগৰিক নোহোৱা লোকৰ নাম অন্তৰ্ভুক্ত হোৱাটো দেশৰ অৰ্থনৈতিক আৰু সামাজিক নিৰাপত্তাৰ দৃষ্টিকোণৰ পৰা উদ্বেগজনক।

সংৰক্ষণ ব্যৱস্থা অব্যাহত ৰখাৰ পোষকতা

সংৰক্ষণ ব্যৱস্থাক লৈ চলি থকা বিতৰ্কৰ মাজতে হোছাবালে সংৰক্ষণ অব্যাহত ৰখাৰ পোষকতা কৰে। তেওঁৰ মতে, সামাজিক বৈষম্য আৰু বৈষম্যমূলক আচৰণৰ ফলত সামাজিক আৰু শৈক্ষিকভাৱে পিছপৰা হৈ পৰা লোকসকলে সংৰক্ষণৰ সুবিধা লাভ কৰি থাকিব লাগে।

তেওঁ কয় যে সমাজত বৈষম্য দূৰ নোহোৱালৈকে সংৰক্ষণ ব্যৱস্থা অব্যাহত ৰখা উচিত। এই ব্যৱস্থাত কোনো পৰিৱৰ্তন আনিবলগীয়া হ’লেও ইয়াৰ সুবিধা লাভ কৰা লোকসকলৰ সৈতে আলোচনা কৰিহে সিদ্ধান্ত লোৱা উচিত।

RSSৰ আন্তঃৰাষ্ট্ৰীয় সংগঠন হোৱাৰ পৰিকল্পনা নাই

RSSৰ বিদেশত উপস্থিতি সন্দৰ্ভতো মন্তব্য কৰে হোছাবালে। তেওঁ স্পষ্ট কৰে যে RSSৰ আন্তঃৰাষ্ট্ৰীয় সংগঠন হোৱাৰ কোনো পৰিকল্পনা নাই আৰু সংগঠনটোৰ কাম-কাজ ভাৰতৰ সীমাৰ ভিতৰতে সীমাবদ্ধ।

অৱশ্যে বিশ্বৰ ৮০ৰ পৰা ১০০খন দেশত RSSৰ স্বেচ্ছাসেৱক থকা বুলি তেওঁ উল্লেখ কৰে। সেই দেশসমূহৰ আইন মানি তাত থকা হিন্দু সমাজক সংগঠিত কৰাৰ প্ৰচেষ্টা চলোৱা হয় বুলিও তেওঁ কয়।